Qazaqstanda TJ tártibin qamtamasyz etýge 24 qaladan 10 myń sarbaz jumyldyryldy

NUR-SULTAN. QazAqparat – Qazaqstan Respýblıkasynyń Qorǵanys mınıstri Nurlan Ermekbaev óńirlik áskerdi arnaýly jıynǵa shaqyrý jumysy jeńil ári shekteýli sıpatta ótetinin aıtty, dep habarlaıdy QazAqparat tilshisi.

«Azamattar turǵylyqty jeri boıynsha shaqyrylady. Ár kesh saıyn úıine qaıtady. Áskerı qyzmetke jumysqa barǵandaı tańerteń keledi. Aımaqtarda arnaýly jıyn Bas shtabtyń kelisimimen jergilikti atqarýshy organnyń sheshimi boıynsha kezeń-kezeńimen ótkiziledi. ıAǵnı bir ýaqytta bolmaıdy. Arnaýly jıynǵa shaqyrtýdy qabyl alý – kúrdeli kezeńde patrıottyqty tanyta bilýdiń múmkindigi. Qarýly kúshter birinshi kúnnen bastap ártúrli mindetterdi oryndaýǵa atsalysyp keledi. Qazirdiń ózinde eldegi 24 qalada 10 myńǵa tarta áskerı qyzmetker jumyldyrylǵan. Olar patrýldeý, dezınfektsııalaý jáne taǵy basqa qajetti sharalardyń bárin atqaryp keledi. Búgingi kúni áleýmettik mańyzy bar 2 myńǵa tarta nysan tazartyldy. Radıatsııalyq, hımııalyq jáne bıologııalyq qaýipsizdikke baılanysty áskerı qyzmetshiler azamattyq qorǵanys salasyna beıimdelip, mindetterin atqarýda», - dedi Nurlan Ermekbaev OKQ-da ótken baspasóz máslıhatynda.

Mınıstrdiń aıtýynsha, qorǵanys salasy Densaýlyq saqtaý mınıstrligine kómek kórsetip, qazir Almaty oblysynda áskerı-dalalyq aýrýhana ornalastyrylǵan.

«Áskerı-kóliktik avıatsııa azamattardy shetelden evakýatsııalaý jumystaryn júrgizip jatyr. Jalpy óńirlik áskerdi arnaýly jıynǵa shaqyrý sıpaty jaǵynan jeńil ári shekteýli bolady. Azamattar úshin eshqandaı yńǵaısyzdyq týyndamaıdy», - dedi Qorǵanys mınıstri.

Eske sala ketsek, keshe Qazaqstan Prezıdenti áskerı mindettilerdi arnaýly jıynǵa shaqyrý týraly Jarlyq shyǵarǵan edi.

Atap aıtqanda qazaqstandyqtar jekelegen óńirlerde medıtsınalyq qyzmet, tasqynmen kúres jáne dezınfektsııa jumystaryna shaqyrylady.