Qazaqstanda tynys demikpesiniń aldyn alý boıynsha onkúndik bastaldy

ALMATY. QazAqparat - Búgin Qazaqstanda tynys demikpesiniń aldyn alý boıynsha onkúndik bastaldy. Ol 7 mamyr - Dúnıejúzilik demikpe kúninde aıaqtalady, dep habarlady uıymdastyrýshylar - Densaýlyq saqtaý mınıstrliginiń salamatty ómir saltyn qalyptastyrý problemalary ortalyǵynyń baspasóz qyzmeti men QR allergologtary men klınıkalyq ımmýnologtary qaýymdastyǵy.

Bıyl, atalmysh shara «Siz demikpeni baqylaýda ustaı alasyz» atty uranmen ótýde. Sharanyń maqsaty - tynys demikpesine baılanysty máselelerge qoǵam nazaryn aýdarý, dárigerlerdiń osy dertke qatysty habardarlyǵyn arttyrý jáne naýqastarǵa der kezinde kómek kórsetý júıesin jaqsartý.

Tynys demikpesi - keń taraǵan sozylmaly aýrýlardyń biri. Dúnıejúzilik densaýlyq saqtaý uıymynyń derekteri boıynsha, búgingi tańda álemde eresek adamdardyń 5 paıyzy, al balalardyń 5 paıyzdan 30 paıyzǵa jýyǵy osy dertten zardap shegedi. Demikpeniń taraýyna syrtqy jáne ishki orta áser etedi. Demikpe tuqym qýalaıdy. Eń basty allergender - úıdegi shań-tozań. Sonymen qatar, usaq keneler, úı janýarlarynyń júni, óńezdengen sańyraýqulaqtar, taǵamdardyń keıbir túri jáne ósimdikterdiń tozańdary. Bul jerde aldyn alý sharalaryn durys júrgizý arqasynda demikpege qarsy qoldanylatyn dárilerge degen qajettilikti ádáýir azaıtýǵa bolady.

Qazirgi tańda tynys demikpesiniń menedjmenti úlken mańyzǵa ıe. Ol birqatar kezeńderden turady.

Onkúndik barysynda elimizdiń barlyq aımaqtarynda «dóńgelek ústelder», konferentsııalar, semınar-trenıngter ótedi. Olarda allergologtar, pedıatorlar, pýlmanologtar jáne basqa da mamandar tynys demikpesiniń aldyn alý máselelerin talqylaıdy.