Qazaqstanda túıe sharýashylyǵyn damytý jáne fermerlerdi sýbsıdııalaý máseleleri talqylandy

TÚRKІSTAN. QazAqparat - «Aýyl» Halyqtyq-demokratııalyq patrıottyq partııasynyń Túrkistan oblysy boıynsha fılıaly elimizde túıe sharýashylyǵyn damytý máseleleri boıynsha kóshpeli semınar-keńes ótkizdi. Partııa belsendileri túıe sharýashylyǵyn damytý men kásippen aınalysatyn fermerlerdi sýbsıdııalaý máseleleri talqylandy, dep habarlaıdy QazAqparat tilshisi.

Otyrar aýdanyna qarasty Qaraqońyr aýylynda ótken basqosýda «Aýyl» Halyqtyq-demokratııalyq patrıottyq partııasynyń ókilderi túıe ósiretin sharýalarǵa beriletin sýbsıdııa kólemin arttyrý men olardyń shyǵyndaryn eskerý kerektigin sóz etti. Mamandardyń aıtýynsha, túıe sútine suranys artqanymen ózindik qunyn aqtamaýda. Al, sýbsıdııa tek óńdelgen sútine ǵana beriledi. Kóptegen qymyran óndirýshiler arnaıy tsehtardyń bolmaýynan sýbsıdııaǵa qol jetkize almaýda. Túıe tuymynan negizi sút, et pen jún óndiriletini belgili. Al, sharýany qynjyltatyny óndirilgen ónimderdi qaıta óńdeý tehnologııasynyń kenjelep turǵany. Osy rette mamandar túıe etin as mázirine engizýdi usynady. Árbir asyl tuqymdy túıe men taýarly analyq basqa bıýdjetten arnaıy qarajat qarastyrylsa dep otyr. Sondaı-aq, túıege bólinetin sýbsıdııaǵa kóbirek kóńil bólingen durys dep sanaıdy. Budan ózge túıe malyn bankter kepildikke almaǵandyqtan, kepildikke qoıý máselelerin qarastyrý qajet ekenin alǵa tartady.