Qazaqstanda tutynýshylarmen jasalatyn sharttarda oqýǵa yńǵaıly qaripterdi jazý mindetteldi

ASTANA. QazAqparat - Qazaqstanda tutynýshylardyń quqyqtaryn buzatyn sharttardyń talaptary anyqtaldy. Bul týraly búgin Úkimet otyrysynda Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

Quqyqtyq kepildikti kúsheıtý úshin tutynýshylarǵa qatysty sharttarǵa engizýge bolmaıtyn talaptar aıqyndaldy. Onyń ishinde tutynýshy bas tartqan jaǵdaıda qyzmetter men taýar qunynyń 30 protsentten astamyn ustap qalý, qyzmet pen taýar qunyn birjaqty tártipte arttyrý máseleleri eskerilgen. Bul ásirese tasymaldaý salasynda ózekti bolyp otyr.

Sonymen qatar mınıstr tutynýshymen aradaǵy shart mátininiń mazmunyna, ony rásimdeýge qatysty jańa talaptar bekitilgenin jetkizdi. Bul turǵyda oqýǵa yńǵaıly qaripterdi jazý, erejeni naqty qısynǵa keltirý talaby qamtyldy.

Budan bólek, taýarlardy satý, qaıtarý jáne aýystyrýǵa qosymsha talaptar engizildi.

Esterińizge sala keteıik, elimizde qazaqstandyq tutynýshylar kóp shaǵymdanatyn salalar belgili boldy.

2016 jyldyń qorytyndysy boıynsha memlekettik organdar tutynýshylardan túsken 23 myńnan astam ótinishti qarady.

«Olardyń ishinde Ulttyq bankke 56 paıyzy, Ulttyq ekonomıka mınıstrligine 19 paıyzy, Densaýlyq saqtaý mınıstrligine 11 paıyzy, Qarjy jáne Energetıka mınıstrlikterine 3 paıyzdan tıesili»,-dep toqtaldy mınıstr.