Qazaqstanda tústi metallýrgııa óndirisiniń kólemi 7,6 paıyzǵa artty

NUR-SULTAN. QazAqparat – Bul týraly Indýstrııa jáne ınfraqurylymdyq damý mınıstrliginiń baspasóz qyzmeti málim etti, dep habarlaıdy QazAqparat tilshisi.

Mınıstrlik málimetinshe, aldaǵy ýaqytta altyn óndiretin «Faza-2» fabrıkasy iske qosylady.

«Atalǵan kásiporyn altyn rýdalaryn qaıta óńdeýdi jylyna 1,2 mln tonnaǵa deıin arttyrýǵa múmkindik bermek. Sáıkesinshe, jylyna altyn óndirisiniń kólemi 13 paıyzǵa artady», - dep atap ótti vedomstvonyń baspasóz qyzmetinen.

Budan bólek, otandyq «RG Gold» altyn óndirý kompanııasy jylyna 5 mln tonna rýda óndirýge qaýqarly jańa taý-ken keshenin ashpaq.

«Qazirgi tańda atalǵan keshenge qural-jabdyqtardy ornatý jumystary júrgizilip jatyr. Keshen bıyl kúzde paıdalanýǵa beriledi degen jospar bar», - dep baıandady mınıstrlikten.

Vedomstvo aqparatyna qaraǵanda, «RG Gold» kompanııasy Raıgorodok aýylyndaǵy turǵyndardyń ál-aýqatyn arttyrýǵa yqpal etedi. Kásiporynǵa qajetti mamandar men jumysshylardy atalǵan eldi mekennen tartý kózdelgen.

Sonymen qatar, mınıstrlik bıylǵy jarty jyldaǵy óńdeý ónerkásibi salasynyń damý qarqynyn baıandady.

Oǵan sáıkes, 6 aıda tústi metallýrgııa óndirisiniń kólemi 7,6 paıyzǵa artqan.

Onyń ishinde rafınattalǵan mys, altyn quımalary, kúmis túıirshikteri, tazartylǵan altyn men kúmis, rafınattalǵan qorǵasyn jáne katodty mys óndirý kólemi ósken.

Foto: baigenews.kz