Qazaqstanda túrmeden bosaǵan tulǵalardy jumysqa ornalastyrýda júıeli jumystar júrgizilmeıdi - S.Mektepbaeva

ASTANA. QazAqparat - Qazaqstanda túrmeden bosaǵan tulǵalardy jumysqa ornalastyrý boıynsha júıeli jumystar júrgizilip otyrǵan joq. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Halyqaralyq túrme reformasy uıymynyń Ortalyq Azııa aımaqtyq dırektory Sáýle Mektepbaeva aıtty.

«Bas bostandyǵynan aıyrý ornynan bosaǵan tulǵalarǵa arnaıy jumys orny kvotasy bekitilgen. Ol kvota 5 paıyzdy quraıdy. Degenmen árbir oblys ártúrli bekitedi. Al bizge óńirlerde kezdesken bekitilgen kvota shamamen 2 paıyzdy ǵana quraıdy»,- dedi ol BAQ ókilderiniń saýalyna oraı.

Onyń atap ótýinshe, qazirgi tańda birqatar úkimettik emes uıym túrmeden bostandyqqa shyqqan tulǵalardy jumysqa ornalastyrý máselelerimen aınalysýda.

«Bul baǵytta jumys istep, bas bostandyǵynan aıyrý ornynan shyqqan tulǵalarǵa qoldaý kórsetetin úkimettik emes uıymdar bar. Degenmen,bul qoldaýdyń qanshalyqty júıeli júrgiziletindigi bólek másele. Ókinishke oraı, bul baǵyttaǵy qoǵamdyq uıymdardyń jumysyna qoldaý bolatyn memlekettik áleýmettik tapsyrys joq», - dedi S.Mektepbaeva.