Qazaqstanda týrızm qalaı jandandyrylmaq

NUR-SULTAN. QazAqparat - Mádenıet jáne sport mınıstri Aqtoty Raıymqulova týrızmdi jandandyrý baǵytyndaǵy naqty mindetterdi atady, dep habarlaıdy QazAqparat tilshisi.

«Pandemııa jaǵdaıynda ishki týrızmniń qanshalyqty suranysqa ıe bolatynyn kózimiz jetti. Bul jaǵdaıda daǵdarysty problema retinde ǵana emes, ony biz jańa múmkindikter retinde qarastyrýymyz kerek. Memlekettiń mindeti – týrızm nysandaryna qajetti ınfraqurylym damytý jáne bıznes úshin qolaıly ınvestıtsııalyq jaǵdaıdy qamtamasyz etý. Bul baǵytta birqatar sharalar qabyldandy», - dedi Aqtoty Raıymqulova mınıstrliktiń alqa májilisinde.

Mınıstrdiń aıtýnysha týrıstik qoǵam, jergilikti atqarýshy organdar úshin óńirlerdiń geografııalyq jáne tarıhı-mádenı erekshelikterin eskere otyryp, jańa ulttyq týrıstik ónimderdi ázirleý mańyzdy mindetterdiń birine aınalýy tıis. Bul týrıstik ónimder ishki ǵana emes, sheteldik týrısterdiń qyzyǵýshylyǵyn arttyrýǵa baǵyttalýy kerek.

«Kelesi mańyzdy mindetterdiń biri - týrıstik qyzmetterdiń eksporty men ımporty arasyndaǵy alshaqtyqty azaıtý. «Qazaqtýrızm» ulttyq kompanııasy osy týrónimderdiń agregatoryna aınalýǵa tıis», - dedi ol.

Mınıstrdiń sózinshe, aldaǵy ýaqytta kelesi mindetterge qol jetkizý josparlanyp otyr:

1) jalpy ınvestıtsııa kólemi 1,1 trln teńge jáne 22 myń jumys ornyn qurý;

2) jergilikti atqarýshy organdarmen birlesip, negizgi týrıstik destınatsııalarda ınjenerlik ınfraqurylymdy qarjylandyrýdy qamtamasyz etý;

3) ishki týrısterdiń 4,5 myń adamǵa deıin ósýin qamtamasyz etý (2020 jylǵa qaraı+22% );

4) jańa redaktsııadaǵy salalyq zań qabyldanǵannan keıin zańǵa táýeldi aktilerdi ázirleý jáne bekitý;

5) Ekologııa, geologııa jáne tabıǵı resýrstar mınıstrligimen birlesip, ulttyq parkterde týrıstik ınfraqurylymdy damytý máselesin pysyqtaý;

6) E-Qonaq aqparattyq júıesin engizý;

7) Qazaqstannyń týrıstik áleýetin ishki naryqta da, syrtqy naryqta da ilgeriletý boıynsha ımıdjdik is-sharalar ótkizý.