Qazaqstanda týrıster sany kóbeıedi

ASTANA. QazAqparat - QR Mádenıet jáne sport vıtse-mınıstri Aqtoty Raıymqulova QR Parlamenti Májilisiniń jalpy otyrysynda týrızm salasynda júrgizilip jatqan jumystar týraly baıandady, dep habarlaıdy QazAqparat.

Onyń aıtýynsha, atalǵan jumystardan soń týrızm salasyndaǵy jumys oryndarynyń sany artýy tıis.

«Shyn máninde týrıstik ónimdi qalyptastyrý aıasynda jumys ornyn kóbeıtýge úsh jylǵa 3,3 mıllıard teńge, ıaǵnı ár jyly 1,1 mıllıard teńge somasynda qoldaý kórsetildi. Jumys ornyn arttyrý 2017 jyly 635 mıllıon teńge bıýdjeti bar "Qazaqtýrızm" ulttyq kompanııasynyń qurylýymen baılanysty boldy. Jobalyq basqarý aıasynda jumys oryndaryn 417 myńǵa deıin ulǵaıtýdy josparlap otyrmyz", - dedi ol.

Vıtse-mınıstrdiń aıtýynsha, Qazaqstandaǵy týrıster sany da edáýir arta túspek.

"Bıyl jáne aldaǵy jyldary «BBC worldnews» veb-portalynda jarnama jasaýdy josparlaýdamyz, bul 124 mıllıon teńgege aınalady. Jumys oryndary máselesine keler bolsaq, 417 myń orynǵa deıin kóbeıtý kózdelgen, al týrıster sanyn 30%-ǵa, ıaǵnı 3,2 mıllıon adamǵa deıin arttyrǵymyz keledi. 2016 jylmen salystyrmaly túrde alyp jatyrmyz, sebebi bıyl EKSPO kórmesi ótti, bul biregeı oqıǵa", - dep atap ótti A.Raıymqulova.Foto brod.kz

Foto brod.kz