Qazaqstanda turǵyn úı baǵasy arzandaı bastady – sarapshy

NUR-SULTAN. QazAqparat – Qazaqstanda baspana baǵasynyń turaqtanyp kele jatqany baıqalyp otyr. Bul týraly Birikken rıeltorlar qaýymdastyǵy prezıdentiniń keńesshisi Nına Lýkıanenko aıtty, dep habarlaıdy QazAqparat tilshisi.

«Baspana naryǵynda múlikti satyp alý-satý sharttarynyń azaıýy turǵysynda baǵanyń turaqtanýy baıqalyp otyr. Osy oraıda múlik ıesi baǵany túsirgen jaǵdaıda ǵana turǵyn úıler satylyp jatyr», - dedi N. Lýkıanenko QazAqparat agenttigine bergen jaýabynda.

Onyń aıtýynsha, jyl basynan baǵanyń ósimi bir aıda 2,1-5,5 paıyzdy qurasa, mamyr-shildede baspana quny onyń jańa nemese eski bolýyna qaraı qalyptasty. Bul turǵyda baspananyń túrine qaraı 0,4 paıyzdan 1,7 paıyzǵa deıin ósti.

«Eger aı saıynǵy ınflıatsııa deńgeıin nazarǵa alsaq, onda jyljymaıtyn múlik quny tómendep kele jatyr degen paıymǵa kelýge bolady», - dedi sarapshy.

Budan buryn habarlanǵandaı, elimizde múlikti satyp alý-satý mámileleriniń sany azaıdy.

Eske salaıyq, bıylǵy 1 sáýirden bastap zeınetaqy qarajatynyń bir bóligin paıdalaný úshin eń tómengi jetkilikti shegi ósti. Jetkilikti shek adamnyń jas ereksheligi boıynsha ártúrli bekitilgen.

2021 jyldyń qańtarynan 2022 jyldyń 1 sáýirine deıin BJZQ salymshylardyń turǵyn úı jaǵdaıyn jaqsartý úshin zeınetaqy jınaǵyn paıdalanýǵa 1 317 739 ótinishin oryndady. Ýákiletti operator-bankterde ashylǵan qazaqstandyqtardyń arnaıy shotyna BJZQ 3,1 trln teńge aýdardy.