Qazaqstanda turatyn ulttardyń as mázirimen tanystyratyn baǵdarlama kórermenge jol tartady (FOTO)

ASTANA. QazAqparat - «Qazaqstan» telearnasynda elimizdegi túrli ult ókilderiniń ashanasyna arnalǵan baǵdarlama jaryqqa shyǵady, dep habarlaıdy «Qazaqstan» RTRK baspasóz qyzmetinen.

Shyǵarmashylyq top baǵdarlama barysynda ár túrli dıaspora ókilderiniń ashanasymen ǵana tanystyrmaı, olardyń mádenıeti men salt dástúriniń erekshe qyzyqty tustaryn kórermenderge jetkizýge tyrysady.

Baǵdarlamanyń negizine eki aspazdyń tamaq daıyndaý saıysy alynady. Onyń biri - kásipqoı, al ekinshisi áýesqoı aspazshy bolady. Máselen, bir habar koreı ashanasyna arnalsa, áýesqoı aspaz koreı ultynyń ókili bolady da, ekinshi saıysker kásibı aspaz bolady. Arnaıy meıramhanaǵa shaqyrylǵan sarapshy mamandar jasalǵan taǵamnyń úzdigin anyqtaıtyn bolady.

Baǵdarlamanyń jalpy sany - 16, ıaǵnı osynsha ult ókilderiniń ashanasyna arnalǵan baǵdarlama jasalady. Joba sońynda eń úzdik aspaz marapattalady.

«As bolsyn» baǵdarlamasyn kórermender «Qazaqstan» telearnasynyń efırinde 10 qazannan bastap, ár senbi saıyn saǵat 10.45-te tamashalaı alady.