Qazaqstanda Turan jolbarysyn qaıtarý jobasy qolǵa alyndy

NUR-SULTAN. QazAqparat - Elimizde Turan jolbarysyn qaıta túletý týraly jańa joba qolǵa alyndy. Bul týraly BUU Damý baǵdarlamasynyń turaqty damý boıynsha basshysy Arman Qashqynbekov málim etti, dep habarlaıdy QazAqparat tilshisi.

«BUU Damý baǵdarlamasy QR Ekologııa, geologııa jáne tabıǵı resýrstar mınıstrligi, WWF (Búkilálemdik jabaıy tabıǵat qory), Reseı Federatsııasynyń Úkimeti jáne Qazaq Geography uıymymen birlesip 2021 jyldan bastap Qazaqstanda Turan jolbarysyn qaıta túletý maqsatynda keńaýqymdy jobany júzege asyrýǵa kirisedi. Kezinde Turan jolbarysy Іle-Balqash rezervatynda mekendegen. Qolda bar aqparattarǵa sáıkes sońǵy jolbarysty 1948 jyly brokonerler atqan. Osylaısha ókinishke qaraı bizdiń elden Turan jolbarysy tolyǵymen joıyldy», - dedi A.Qashqynbekov.

Onyń aıtýynsha, Turan jolbarysy barlyq Ortalyq Azııa elderi aýmaǵynda mekendeıdi.

«Qazirgi tańda ulttyq maqtanyshymyz ilbis (qar barysy) bolsa, endi 5 jyldan keıin elimizdegi alǵashqy Turan jolbarystarymen maqtanatyn bolamyz. Alǵashqy Turan jolbarystaryn Reseıdiń Prıamýre aýmaǵynan 5 jyldan keıin, múmkin odan da buryn ákeletin bolamyz. Keıbir genetıkalyq zertteýge sáıkes, amýr jolbarystary Turan jolbarystyranyń alys týysy bolyp keledi», - deıdi ol.

A. Qashqynbekovtiń málimdeýinshe, Turan jolbarystaryn qaıta jańǵyrtý jobasy osydan 3-4 jyl buryn Sankt-Peterbýrgte ótken ekonomıkalyq forýmda tanystyrylyp, izinshe Reseı Úkimeti jobany bekitti.

«Alǵashqy ýaqytta jobany jobany iske asyrý jumystary júrmedi. Endigi ýaqytta quzyrly memlekettik organdardyń qoldaýymen qaıta qolǵa alynýda. Atalǵan jobany qarjylandyrý BUU Damý baǵdarlamasy, WWF (Búkilálemdik jabaıy tabıǵat qory) jáne QR Úkimetiniń esebinen júzege asyrylady. Aldymen jolbarys mekendeıtin aýmaq pen olardyń azyq bazasy daıyndalady. 4-5 jyldan keıin alǵashqy 12-13 Turan jolbarysy ákelinip, olardyń beıimdelýi qadaǵalanady. Sodan soń ǵana erkindikke jiberiledidy. 2050 jylǵa qaraı elimizdegi Turan jolbarysynyń sany 100-den asady dep boljanyp otyr», - dedi ol.

BUU Damý baǵdarlamasy ókiliniń málimdeýinshe, joba joıylǵan ańdy el aýmaǵyna qaıtarýmen qosa, ulttyq qundylyǵymen erekshelenedi.

«Meniń Facebook-tegi Turan jolbarysy týraly jazbamnan soń kóptegen kásipkerler, Úkimettik emes uıym ókilderi jáne ekologııalyq belsendiler kómektesýge daıyn ekendigin jetkizdi. Bul qýanarlyq jaǵdaı. Búginde elimiz úshin mańyzdy bolyp tabylatyn jobany júzege asyratyn komanda jınaqtaldy», - dedi Arman Qashqynbekov.

Eske sala ketsek, buǵan deıin QR Ekologııa, geologııa jáne tabıǵı resýrstar mınıstrligi Іle ózeniniń saǵasyndaǵy Balqash kóliniń ońtústik jaǵalaýy jáne osydan shyǵysqa qaraıǵy jer Turan jolbarysy jersindiriletin aýmaq retinde tańdalǵany týraly habarlady.