Qazaqstanda tuńǵysh ret jasóspirimniń aǵzasyna ınnovatsııalyq ımplant engizildi
17 jastaǵy stýdent jol apaty saldarynan 12 jyl boıy aýzyn tolyq asha almaı, qıyndyq kórgen. Operatsııa sátti ótti. Endi dárigerler bul tyń ádisti keńinen meńgerip, eldiń barlyq óńirinde engizýge nıetti. Sebebi, Qazaqstanda 40-qa jýyq bala osyndaı emge muqtaj. Al shetelde mundaı operatsııanyń quny 50 myń dollardan asyp jyǵylady.
Stýdent balaǵa otandyq dárigerler buǵan deıin 3 ret operatsııa jasaǵan. Biraq nátıje bolmaǵan. Keıin Dıas Ana men bala ortalyǵyna júgingen. Jasóspirim qazir ózin jaqsy sezinedi. Aýzyn tolyq ashyp, ózdiginen tamaqtanady, emin-erkin sóıleıdi. Tipti, 8 keli salmaq qosqan. Dıastyń oń jaq súıegine qazir protez salyndy. Biraq ony jasaý ońaıǵa soqpaǵan. Mamandar jasóspirimniń sýretin arnaıy kompıýterlik baǵdarlamaǵa salyp, 3D keskinin jasaǵan. Sosyn protezdi shetelden arnaıy tapsyryspen aldyrtqan.
Al buryn-sońdy bolmaǵan emdi ázirge ortalyqta, hırýrg Rýslan Sıa-Týn-Chın ǵana meńgergen. Ol úshin maman Reseıde arnaıy bilimin shyńdaǵan. Árıne, bilikti maman jyl saıyn 180-nen asa operatsııa jasap júrse de, mundaı kúrdeli emdi alǵash ret qoldanǵan. Bes saǵatqa sozylǵan operatsııaǵa Rýslannan bólek 7 maman qatysty. Em-dom sátti aıaqtaldy.
«Arnaıy protez daıyndamaı, standartty túrin qoldanýǵa bolady. Biraq tájirıbe onyń tıimdiligi az ekenin kórsetip otyr. Árıne, tıtannan jasalǵan protezdiń ornyna adamnyń san eti súıegin alyp, jaǵyna sáıkestendirip qoıýǵa bolady. Biraq ýaqyt óte kele súıek qurylysy 20-30 paıyzǵa sorylyp, jaqtyń uzyndyǵy men bıiktigine sáıkes kelmeýi múmkin. Sondyqtan biz balaǵa arnaıy ózine laıyqtap jasalǵan protez saldyq. Bala ósse de, protezdiń eshqandaı keri áseri bolmaıdy», - deıdi jaq-bet súıegi hırýrgy Rýslan Sıa-Týn-Chın.
Dárigerlerdiń aıtýynsha, mundaı operatsııany jasóspirim 15 jastan asqan kezde ǵana jasaýǵa bolady. Sebebi, oǵan deıin balanyń jaq-bet súıegi ósip-jetiledi. Al elimizde mundaı em-domǵa muqtaj jandar barshylyq. Ana men bala ortalyǵy olarǵa kómek qolyn sozýǵa daıyn.
«Alǵan ımplanttyń baǵasy bar, 3D salǵan baǵasy bar. Sonda 2-3 mln shyqty. Ózimizde jasasaq osynsha aqsha. Qazir problema joq. Dárigerler kórdi. Óz qoldaryna senip, ári qaraı ony damytsa, endi úkimettiń kómegi bolsa. Dárileri, shyǵyn zattary bolsa, ony isteıdi», - Ana men bala ortalyǵy dırektorynyń orynbasary Sholpan Altynova.