Qazaqstanda tuńǵysh ret short-trekten Álem kýbogy kezeńi ótedi

ASTANA. QazAqparat - Halyqaralyq konkımen júgirý sporty federatsııasy (ISU) Qazaqstanda short-trekten Álem kýboginiń kezeńi ótetinin resmı túrde bekitti. Bul týraly QazAqparat UOK baspasóz qyzmetine silteme jasap habarlaıdy.

Kýbokty doda Almaty qalasynda ótedi. Al týrnır 2018 jyldyń 7-9 jeltoqsanyna josparlanǵan. 

Qazaqstanstan short-trekten álemdik deńgeıdegi jarysty alǵash ret ótkizgeli otyr. Budan buryn elimizde shortrekshiler qatysýymen Ýnıversıada-2017 (Almaty) jáne Azıada-2011 (Astana) syndy keshendi týrnırler ǵana ótken.

Kýbokty ótkizý úshin Almatyny tańdap alý kezdeısoqtyq emes. Sporttyq ınfraqurylymy jasaqtalǵan zamanaýı sport kesheni men Búkilálemdik stýdentter oıynyn ótkizý tájrıbesi úlken ról oınady. Odan bólek, jankúıerlerdiń belsendiligi de esepke alyndy. Ýnıversıada kezinde árbir jarys kúni ulttyq quramaǵa qoldaý bildirgen jankúıerge toly bolǵan edi. 

Qazaqstandyq short-trekshilerdiń álemdik jarystarda sátti óner kórsetýi óz jerimizde ótetin kýbokty dodaǵa jankúıerlerdi kóp jınaıdy degen senim bar. Ótken maýsymda bizdiń eki birdeı sportshymyz Álem kýboginiń jalpy esebindegi júldegerler tizimine engen bolatyn.  Abzal Ájiǵalıev 500 metrge júgirýden Álem kýboginiń qorytyndysy boıynshy ekinshi oryn aldy. Al 1000 metrge júgiretin qazaqstandyq Nurbergen Jumaǵazıev úshinshi satyda. 

Óz elimizde ótetin Álem kýboginiń kezeńi ulttyq qurama sportshylarynyń kósile shabýyna múmkindik bermek. 

Aıta keteıik, short-trekten halyqaralyq maýsym  8 qarasha kúni Kalgarıde (Kanada) bastalady. Qazaqstanda úshinshi kezeń ótedi. 2018/2019 jylǵy maýsymda Álem kýboginiń jalpy esebi alty kezeńi ótedi.

Eske sala keteıik, short-trekten Qazaqstan ulttyq quramasy Máskeýde Reseı quramasymen birlesken oqý-jattyǵý jıyndaryn ótkizip jatyr.