Qazaqstanda tuńǵysh ret sýrdo dzıýdodan álem chempıonaty ótedi

<p>ASTANA. KAZINFORM &ndash; Túrkistanda 12-14 sáýir kúnderi sýrdo dzıýdodan álem chempıonaty ótedi. Álem birinshiligi Qazaqstan sýrdo dzıýdo federatsııasy men Qazaqstan Sýrdlımpıada komıtetiniń uıymdastyrýymen ótkizilmek.</p>

Atalǵan federatsııa málim etkendeı, álem chempıonatyna 25 elden 200 sportshy qatysady dep josparlanǵan. Qazaqstan tarapynan 22 dzıýdoshy óner kórsetedi.

«Qazaqstan jalpy sýrdlımpıadalyq sport túrleri boıynsha elimizde birinshi ret álem chempıonatyn qabyldaıyn dep otyr. Bul tarıhı oqıǵa jáne biz úshin úlken jaýapkershilik. Estý qabileti zaqymdanǵan sportshylardy qoldaýdyń jarqyn belgisi dep bilemiz. Bizdiń elimizde dzıýdo sporty jaqsy damyǵan. Sonyń ishinde sýrdo dzıýdomen aınalysatyndar sany da az emes. Sportshylarymyzdyń eshteńege qaramastan, moıymaı, maqsatqa jetý jolyndaǵy jankeshtiligi bizdi árdaıym jigerlendiredi, tánti etedi. Túrkistan tatamıinde Sýrdlımpıada chempıondary, álem chempıondary bas qosady», - deıdi Qazaqstan sýrdo dzıýdo federatsııasynyń prezıdenti Qýanyshbek Muqash.

Sýrdo dzıýdodan álem chempıonaty Túrkistan qalasyndaǵy «Olympic centre» sport kesheninde ótedi.