Qazaqstanda tranzıti konteınerlik tasymal kólemi 4,5 esege ósti

ALMATY. QazAqparat - Tranzıttik poıyz arqyly mıllıonynshy konteıner Qytaıdyń Sıan qalasynan Qazaqstannyń Altynkól stantsııasyna jetkizildi, dep habarlaıdy QazAqparat tilshisi.

Temirjol stantsııasynda ornalasqan «KTZE Khorgos Gateway» qurlyq portynda poıyz tar joldan keń jolǵa aýysqan soń, konteıner Aqtaý portyna, odan ári Kaspıı teńizi arqyly Túrkııanyń Mersın qalasyna jóneltiledi.

«KTZ Express» AQ basshysy Nurlan Igembaevtyń aıtýynsha, konteınerdi Sıannan Mersınge aparýǵa 17 kún ketedi. Eki ara - 9 myń shaqyrym.

«Eger Qytaı jaǵy balama retinde Qazaqstan aýmaǵynan basqa baǵytty tańdap, teńiz jolymen Túrkııaǵa júk tasymaldasa, oǵan 35 kún keter edi. Búgin mine «QTJ» UK» AQ temir jol jelisi arqyly tasymaldanatyn konteınerlik tranzıttik júkterdiń jyldyq kólemi alǵash ret mıllıon JFE-ge jetip otyr.

Aıta ketý kerek, 2016 jyldan bastap tranzıti konteınerlik tasymaldaý kólemi 4,5 ese kóbeıgen. Sarapshylar bul úrdis aldaǵy jyldary da jalǵasady degen boljam jasap otyr.

Bul jetistik temirjolshylardan Táýelsizdiktiń 30 jyldyǵyna laıyqty syı bolǵaly tur», - dedi Nurlan Igembaev.