Qazaqstanda transplantatsııanyń 84,2%-y týystas donordan jasalady

NUR-SULTAN. QazAqparat – Qazaqstanda transplantatsııanyń 84,2%-y týystas donordan jasalady. Densaýlyq saqtaý mınıstrliginiń Medıtsınalyq kómekti uıymdastyrý departamenti dırektorynyń orynbasary Kúlaıym Birjanova elimizde transplantatsııalyq qyzmetti damytýdyń júıeli sharalary týraly baıandady, dep habarlaıdy QazAqparat.

«2012 jyly 8 tamyzda Qazaqstanda Ulttyq ǵylymı kardıohırýrgııa ortalyǵynyń bazasynda alǵash ret donor júreginiń transplantatsııasy jasaldy. 2012 jyldan qazirge deıingi kezeńde Qazaqstan Respýblıkasyna 2000-nan asa aǵza múshesiniń transplantatsııasy oryndaldy, onyń ishinde 87-si júrekti almastyrý boıynsha jasaldy. Qazaqstanda týystas donordan jasalatyn transplantatsııanyń úlesi – 84,2%, óli donordan jasalatyn transplantatsııa – 15%», - dedi ol transplantatsııadan keıingi jáne dıalızdegi patsıentter arasynda ótken eýropalyq sport chempıonatyna qatysqan Qazaqstan quramasynyń qorytyndy baspasóz konferentsııasynda.

Spıkerdiń aıtýynsha, elimizde aǵza múshesi donorlyǵyn damytý maqsatynda birqatar júıeli shara qabyldanǵan. Máselen, normatıvtik-quqyqtyq baza jetildirildi, atap aıtqanda azamattardyń qaıtys bolǵannan keıin aǵza múshesi donory bolýǵa yqtııaryn egov.kz portalynda is júzinde bildirý quqyǵy rettelip, donorlyq uıymdardyń óli donorlardy kondıtsııalaý shyǵyndaryn óteý mehanızmi engizildi. Elektrondy formattaǵy «kútý tizimi» jasaqtaldy. «Transplantatsııany úılestirý» dárigerlik mamandyǵy «Densaýlyq saqtaý salasyndaǵy mamandyqtar men mamandandyrýlar nomenklatýrasyna», al respýblıkalyq, óńirlik jáne statsıonarlyq deńgeıdegi transplantatsııa úılestirýshisi laýazymy «Densaýlyq saqtaý qyzmetkerleriniń laýazymy nomenklatýrasyna» qosyldy.

Aıta ketsek, tamyzda Qazaqstan quramasy transplantatsııadan keıingi jáne dıalızdegi patsıentter arasynda ótken Eýropa chempıonatynda 12 medal jeńip alyp, jalpykomandalyq esepte 18-oryn aldy.

Chempıonatqa transplantatsııadan keıingi jáne dıalızdegi patsıentterdiń Eýropalyq sport federatsııasyna múshe 26 elden 400-den asa sportshy qatysty. Bul federatsııaǵa 2018 jyldan beri Qazaqstan atynan «Ómir tynysy» transplantatsııa jasalǵan naýqastardyń qoǵamdyq birlestigi ókildik etedi.

Bıylǵy Eýropa chempıonatyna Qazaqstan qurama komandasy sapynda 2019 jyly respýblıkalyq jarysta júldeger atanǵan, júrek jáne búırek transplantatsııasyn bastan ótkergen, sondaı-aq dıalızdegi 16 sportshy qatysty. Olar júzý, ústel tennısi, darts, boýlıng, voleıbol boıynsha saıysqa tústi.