Qazaqstanda tótenshe jaǵdaı kezinde qandaı jańa salyq jeńildikteri engizildi

NUR-SULTAN. QazAqparat - «Salyq salý máseleleri boıynsha ekonomıkany turaqtandyrý jónindegi odan arǵy sharalar týraly» QR Prezıdentiniń 16 naýryzdaǵy Jarlyǵyn iske asyrý boıynsha odan arǵy sharalar týraly» QR Úkimetiniń 20 sáýirdegi qaýlysy arqyly kezekti salyqtyq yntalandyrýlar toptamasy kózdelýde, dep habarlaıdy QazAqparat QR Ulttyq ekonomıka mınıstrliginiń baspasóz qyzmetine silteme jasap.

Birinshiden, Memleket basshysynyń 2020 jylǵy 31 naýryzdaǵy málimdemesinde aıtylǵan tapsyrmalardy oryndaý úshin aǵymdaǵy jylǵy 1 sáýirden 1 qazanǵa deıin ekonomıkanyń kóp zardap shekken salalaryndaǵy shaǵyn jáne orta bıznes sýbektileri salyqtan jáne eńbekaqy tóleý qorynan alynatyn áleýmettik tólemderden (jeke tabys salyǵy, áleýmettik salyq, mindetti zeınetaqy jarnalary, mindetti medıtsınalyq saqtandyrý jáne áleýmettik aýdarymdar) bosatyldy.

Saýda, qoǵamdyq tamaqtandyrý, qonaq úı nysandary, kólik jáne konsýltatsııalyq qyzmet kórsetý jáne ІT salasyn qosqandaǵy qyzmet túrleriniń tolyq tizimi osy qaýlynyń 1 qosymshasyna sáıkes, bekitilgen.

Budan basqa, 2 qosymshaǵa sáıkes, aǵymdaǵy jylǵy 1 sáýirden 1 shildege deıin jekelegen iri kásipkerlik sýbektileri jeńildikterdi qoldaný úshin zardap shekken salalar boıynsha qyzmet túrleriniń tizbesi anyqtaldy.

Ekinshiden, áýe qatynasy salasynda ınfraqurylymdy qoldaý jáne jumys ornyn saqtaý maqsatynda ushýlar toqtatylǵan kezeńde yntalandyrý sharalary qabyldandy: barlyq áýejaılar aǵymdaǵy jylǵy 1 sáýirden 1 qazanǵa deıin múlik salyǵynan bosatylyp, jyl sońyna deıin áýe kemelerine tehnıkalyq qyzmet kórsetý jáne lızıngtik mámilelerdi zańdyq súıemeldeý boıynsha beırezıdentter úshin qosylǵan qun salyǵyn tóleý uzartyldy.

Úshinshiden, aǵymdaǵy jylǵy 1 qazanǵa deıin jeke praktıkamen aınalysatyn tulǵalar (notarıýstar, advokattar, sot oryndaýshylar, medıatorlar) múlik salyǵynan bosatyldy. Budan buryn, iri saýda nysandary, saýda oıyn-saýyq ortalyqtary, kınozaldar, teatrlar, kórmeler, sporttyq nysandar, sondaı-aq qoǵamdyq tamaqtandyrý, qonaq úı, týrıstik qyzmet nysandary jyldyń sońyna deıin múlik salyǵynan bosatylǵan bolatyn.

Tórtinshiden, indetke qarsy is-sharalarǵa jumyldyrylǵan jumyskerler barlyq salyq túrlerinen jáne eńbekaqy tóleý qorynyń áleýmettik tólemderinen bosatyldy.

Besinshiden, salyq tóleýshilerge qolaıly bolý úshin 2019 jylǵy salyqtyq mindettemeler esebi nysanyn tapsyrý merzimi 2020 jylǵy 31 naýryzdan 2020 jylǵy 31 mamyrǵa aýystyryldy.