Qazaqstanda tótenshe jaǵdaı kezinde áreket etý máselesi qaıta qaralady

NUR-SULTAN. QazAqparat - QR Premer-Mınıstri Álıhan Smaıylov tótenshe jaǵdaı kezinde jedel áreket etýdi uıymdastyrýdaǵy problemalardy joıý boıynsha júrgizilip jatqan jumystar týraly aıtyp berdi, dep habarlaıdy QazAqparat tilshisi.

«Memleket basshysynyń kúshtik qurylymdardyń sheshim qabyldaý kezinde derbestigin qamtamasyz etý jáne olardyń basshylarynyń jaýapkershilik deńgeıin arttyrý máseleleri jónindegi tapsyrmalaryn iske asyrý sheńberinde azamattyq qorǵanys pen áskerı bólimderdiń qyzmetin jetildirý týraly» 2014 jylǵy 11 sáýirdegi Qazaqstan Respýblıkasynyń zańyna ózgerister men tolyqtyrýlar pysyqtalýda», - dep jazdy Álıhan Smaıylov depýtattyq saýalǵa bergen jaýabynda.

Onyń aıtýynsha, tótenshe jaǵdaıǵa den qoıýdy uıymdastyrýdaǵy problemalar (medıtsına, áleýmettik qorǵaý, quqyq tártibin qorǵaý, kommýnaldyq qyzmetter, jabdyqtaý, baılanys, bank júıesi jáne t.b. máselelerdi qosa alǵanda) halyqaralyq uıymdardyń sarapshylaryn tarta otyryp, qurylatyn vedomstvoaralyq jumys toby sheńberinde qaıta zerdelenbek.

«Sondaı-aq, barlyq reglamentterge, algorıtmder men protsesterge, tótenshe jaǵdaılardaǵy is-qımyldar josparlaryna taldaý júrgiziledi. Onyń ishinde qarjy resýrstary rezervi, azyq-túlik qory, dári-dármek, materıaldyq-tehnıkalyq quraldar qaıta qaralady. Saýalda kórsetilgen máseleler egjeı-tegjeıli pysyqtalǵannan keıin vedomstvoaralyq jumys toby sheńberinde tótenshe jaǵdaılar mınıstrligi qosymsha aqparat usynady», - dep túıindedi Premer-Mınıstr.