Qazaqstanda tórtinshi tsıfrlyq HQO ashyldy

ASTANA. QazAqparat - «Azamattarǵa arnalǵan úkimet» memlekettik korporatsııasy Qostanaı qalasynda halyqqa qyzmet kórsetetin tsıfrlyq ortalyqty ashty, dep habarlaıdy QazAqparat vedomstvonyń baspasóz qyzmetine silteme jasap.

Bul - respýblıkadaǵy tórtinshi tsıfrlyq HQO. Búginde osyndaı ortalyqtar Astana, Almaty, Shymkent qalalarynda qyzmet kórsetip otyr. Bul jerde azamattar memlekettik qyzmetterdi ózdiginshe, operatordyń kómeginsiz ala alady. Sondaı-aq munda tsıfrlyq saýattylyqty arttyrýǵa arnalǵan oqý bólmesi jabdyqtalǵan.

«Tsıfrlyq Qazaqstan» memlekettik baǵdarlamasy aıasynda azamattarǵa memlekettik qyzmetterdi óz betinshe alýdy úıretýimiz kerek. Bul úshin osyndaı ortalyqtardy barlyq oblys ortalyqtarynan ashý josparlanǵan. Qazirgi ýaqytta halyqqa qyzmet kórsetetin tsıfrlyq ortalyqtar úsh qalada ǵana bar. Al Qostanaı qalasy úsh megapolısten keıin tsıfrlyq HQO ashylǵan alǵashqy oblys ortalyǵy boldy», - deıdi «Azamattarǵa arnalǵan úkimettiń» Qostanaı oblysy boıynsha fılıal dırektorynyń orynbasary Azamat Imambekov. 

Tsıfrlyq HQO Táýelsizdik kóshesi, 46 mekenjaıynda («Metropol» meıramhanasynyń burynǵy ǵımaraty), birinshi qabatta ornalasqan.

Al ǵımarattyń ekinshi qabatyna Qostanaı qalasynyń №1 HQO-sy kóshti. Buǵan deıin bólimshe Táýelsizdik, 114 mekenjaıynda ornalasqan bolatyn. Jalpy, azamattar osy bólimdegi jaǵdaıdy jaqsartýdy talap etip, jıi shaǵymdanatyn edi. Osy eskertýler esepke alynyp, №1 bólimshe zamanǵa saı ǵımartqa kóshirildi. Operatorlar qyzmet kórsetetin 21 jumys ústelimen jabdyqtaldy.

Sondaı-aq, Qostanaı qalasynyń áleýmettik qamtamasyz etý bólimderi de osy ǵımaratta qyzmet usynyp, jumys isteıdi.

Qostanaı qalasynda ornalasqan basqa da front-ofısterdiń mekenjaıy:

№2 bólim - Gasheka kósh., 14;

№3 bólim - Kýrganskaıa kósh., 31;

mamandandyrylǵan halyqqa qyzmet kórsetý bólimi - Karbyshev kósh., 12/10.

Halyqqa qyzmet kórsetý ortalyqtary dúısenbi - senbi aralyǵynda saǵat 09.00-den 20.00-ge deıin úzilissiz jumys isteıdi.