Qazaqstanda «Tórelik sot týraly» zań jobasy Parlamentke joldanbaq

ASTANA. QazAqparat - QR Ádilet mınıstrligi 2015 jyldyń 1 sáýirine deıin «Tórelik sot týraly» zań jobasyn Parlamentke joldaıdy. Bul týraly búgin Ádilet vıtse-mınıstri Záýresh Baımoldına málim etti.

«Úkimetke engizilgen bul zań jobasy 2015 jyldyń 1 sáýirine deıin el Parlamentine engizilip, sessııa sońyna deıin qabyldanady dep úmittenemiz. Biz «Tórelik sot týraly» jańa zań QR Azamattyq protsessýaldyq kodekspen birge engizilýin qalaımyz», - dedi Baımoldına halyqaralyq tórelikti damytýǵa arnalǵan semınarda.

«Birinshiden, biz zań jobasynda tórelik sottyń qaraýyna barlyq múliktik daý-damaılardy jatqyzdyq. Onyń ishine tek kámelettik jasqa tolmaǵandardyń, sotpen iske qabiletsiz nemese shekteýli qabiletsiz dep tanylǵan tulǵalardyń múddeleri bar ister, sonymen qatar jeke múliktik emes daýlar qaralmaıdy», - dep atap ótti vıtse-mınıstr.

Óz kezeginde Qazaqstannyń kásipkerler palatasy Qazaqstanda Tórelik sot qaýymdastyǵyn qurýdy usynýda.

«Búginde qazaqstanda tórelik sottyń qyzmetin retteıtin, tóreshilerdi jáne medıatorlardy daıyndaıtyn, tıisti halyqaralyq sertıfıkattar beretin biryńǵaı organ joq. Turaqty tóreshiler jáne aralyq sottar týraly aqparat, olardyń qyzmetine qatysty statıstıka da keltirilmeıdi. Osyǵan oraı Qazaqstanda Tórelik sot qaýymdastyǵyn qurý qajet», delingen palatanyń taratqan resmı habarlamasynda.