Qazaqstanda tergeýshilerdiń ortasha jalaqysy qansha

NUR-SULTAN. QazAqparat – Qylmystyq isti qaraý men onyń aq-qarasyn anyqtaýda tergeýshi mamannyń róli mańyzdy. Búginde elordada 350-den astam tergeýshi qyzmet etip jatyr. Osy oraıda elimizde tergeýshi mamandarǵa qandaı jaǵdaı jasalǵan jáne olardyń jalaqysy qandaı? Bul suraqqa Nur-Sultan qalasy Polıtsııa departamenti Tergeý basqarmasynyń basshysy Ǵumar Shynybekov jaýap berdi, dep habarlaıdy QazAqparat tilshisi.

«Búginde tergeýshiler ortasha eseppen 200-250 myń teńge jalaqy alady. Eskerý kerek, jalaqy kólemi tergeýshiniń eńbek ótili men shenine de baılanysty. Sondaı-aq, bizdiń mamandar baspanamen qamtylady. Ózderińiz biletindeı elordaǵa óńirlerden kelýshiler kóp, olardyń báriniń birdeı turǵyn úıi joq. Osy oraıda biz olardy qyzmettik baspanamen qamtımyz. Búginde elordada 358 tergeýshi maman bar», - dedi Ǵumar Shynybekov baspasóz máslıhatynda.

Sondaı-aq, Polıtsııa departamentiniń ókili, atalǵan salada kadr tapshylyǵynyń baryn aıtty.

«Qazirgi kúni Nur-Sultan qalasynyń tergeý qyzmetinde 13 bos jumys orny bar. Biz maman tapshylyǵyn sheshý maqsatynda qaladaǵy zań salasy mamandaryn daıarlaıtyn birneshe joǵary oqý ornymen memorandým jasastyq. Sonyń negizinde bizge qajetti mamandar ázirlenip jatyr», - deıdi ol.

Buǵan deıin elordanyń Tergeý basqarmasynyń basshysy atalǵan sala mamandarynyń biliktiligin kóterý máselesine bólek toqtalyp ótken bolatyn.

«Tergeý bólimsheleri qyzmetkerleriniń kásibı deńgeıin joǵarylatý maqsatynda zańnamadaǵy ózgeristerdi qosymsha zerdeleý men talqylaý boıynsha sabaqtar, kýrstar men semınarlar únemi ótkizilip turady. Sondaı-aq, vedomstvolyq joǵary oqý oryndarynda biliktilikti arttyrý kýrstary da qarastyrylǵan. Odan bólek, tergeý bóliminde jumys isteýge nıettiler Qaraǵandy akademııasynyń bazasynda 6 aılyq bastapqy daıyndyq kýrsynan ótý múmkindigi bar. Bizdiń maqsat – qylmystyq protseske qatysýshylardyń quqyqtary men bostandyqtaryn qorǵap, azamattardyń quqyq qorǵaý organdaryna degen senim deńgeıin arttyrý», - degen edi Ǵ. Shynybekov.