Qazaqstanda tergeý júrgizetin arnaıy kabınetter jasaqtalmaq

ASTANA. QazAqparat - Kúdiktilerdi tergeıtin arnaıy kabınetter beıne túsirilimmen jabdyqtalmaq. Bundaı qadam tergeý barysynda adamdy azaptaý men jaýapty májbúrlep alý jaǵdaılaryna tosqaýyl qoıý maqsatynda engizilmek. Osy rette bundaı usynysty búgin alqa májilisinde QR Bas prokýrorynyń orynbasary Erlik Kenenbaev aıtty, dep habarlaıdy QazAqparat.

«Jyl saıyn Qazaqstanda qylmystyq protsesterde zań buzýshylyqtar azaımaı tur. Azaptaýǵa qatysty shaǵymdar kóp. Kýágerlerdi kóndirý nemese qorqytý múmkindigi bar. Adamı faktorǵa tosqaýyl qoıyp, jańa tehnologııalardy batyl engýzi kerek. Barlyq úrdisti beıne taspaǵa jazýdy usynamyz. Tergeý organdarynda jaýap alatyn arnaıy kabınetterdi qurýdyń ýaqyty jetti. Bul álemdik tájirıbe. Ondaǵy tergeý amaldary ashyq júrgiziledi, osy rette kabınetter beınekameralarmen jabdyqtalǵan. Taspadaǵy málimetter hattamaǵa tirkeledi», - dedi Kenenbaev.

Osy oraıda vedomstvo zańnamalyq túzetýlerdiń tıisti paketin sáýir aıynda usynýdy josparlap otyr.