Qazaqstanda telekommýnıkatsııalar týraly jańa zań ázirlenip jatyr

<p>ASTANA. KAZINFORM &ndash; QR Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııa komıtetiniń tóraǵasy Damır Seısembekov jańa telekommýnıkatsııalar týraly zańda qarastyrylatyn negizgi ózgerister týraly aıtyp berdi.</p>

Onyń aıtýynsha, zańda derekterdi berý jáne telekommýnıkatsııa jelilerine basa nazar aýdarylady.

– Jalpy, qazirgi qoldanystaǵy baılanys týraly zań negizinen telefonııaǵa baǵyttalǵan. Al búgingi áńgime derekterdi berý, telekommýnıkatsııa jelileri, elektrlik baılanys týraly bolmaq. Tıisinshe, zańda derekterdi berý máseleleri men ony retteýge baılanysty normalar men erejeler qarastyrylady, – dedi Damır Seısembekov «Astana habta» ótken strategııalyq talqylaýda. 

Ol Qazaqstanda derekterdi óńdeý ortalyqtary qarqyndy damyp, jańa tehnologııalar engizilip jatqanyn atap ótti. 

– Mysaly, geostatsıonarlyq emes spýtnık stantsııalar – Starlink, OneWeb týraly qazirgi zańda bir ǵana sóılem jazylǵan. Olardy qalaı retteý kerek, bul zańdy ma, zańsyz ba – eshteńe jazylmaǵan. Jańa zańda osyǵan arnaıy bap arnap, olardy qalaı retteý kerektigin anyqtaımyz. Qandaı ınfraqurylymdy paıdalanýǵa bolatynyn, al qaısysyn bolmaıtynyn naqtylaımyz, óıtkeni bul ulttyq qaýipsizdikke qatysty. Biz kontent bóligin shektemeımiz, biraq ınfraqurylymnyń qalaı jumys isteýi kerektigin anyqtaımyz, - dep túsindirdi komıtet basshysy.

Sonymen birge, zań jobasy baılanys sapasyn jaqsartýǵa baǵyttalmaq.

– Mysaly, keshe ǵana Almaty oblysynda jańa tehnologııa tanystyryldy. Onda aýyldyq eldimekende FIVE (Fixed Wireless Access) tehnologııasy arqyly symsyz ınternet iske qosyldy. Bir aýylda shamamen 100 turǵyndy 300 Mbıt/s jyldamdyqtaǵy ınternetpen qamtamasyz etti, bul qalalardaǵy baılanystan kem emes. Qazirgi baılanys týraly zańda mundaı termın men uǵym joq. Al jańa telekommýnıkatsııalar týraly zańda bul eskeriledi, - dedi Seısembekov.

Onyń aıtýynsha, sıgnal ustamaıtyn «aq daqtardy» joıý jumystary da jalǵasýda.

– 2024 jyly biz 324 aýyldyq eldimekendi 4G baılanysymen qamtamasyz ettik, ol jerlerde múlde ınternet bolmaǵan. Biraq áli de baılanysqa qosylmaǵan eldimekender bar. Qazaqstan boıynsha shamamen 350, Astanada 30-ǵa jýyq «aq daq» bar, ol jerlerde uıaly baılanys ustamaıdy. Biz bul máselelerdi zań qabyldansa da, qabyldanbasa da sheshý baǵytynda jumys istep jatyrmyz. Alaıda jańa zań tehnologııalardyń damýyna jáne jańa tásilderge sáıkes bul salany retteýge arnalǵan, - dep qorytyndylady ol.

Buǵan deıin D. Seısembekov Qytaıdyń Shanghai Spacecom Satellite spýtnıktik kompanııasymen memorandýmǵa qol qoıý josparlanǵanyn aıtqan edi. 

Sondaı-aq QR Prezıdentiniń keńesshisi Qýanyshbek Esekeev zań qabyldaýda keshikpeý keregin aıtty.