Qazaqstanda táýlik ishinde jolda qalǵan 690-nan astam adam qutqaryldy

ASTANA. QazAqparat – Elimizde aýa raıynyń buzylýyna (burqasyn, joldyń durys kórinbeýi, kóktaıǵaq) baılanysty 72 jol ýchaskesi jabyldy, onyń 40-y respýblıkalyq, 32-si oblystyq mańyzy bar, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.

Joldardaǵy tótenshe jaǵdaılardy joıý jónindegi respýblıkalyq shtab quryldy, mundaı shtabtar oblystarda da (Abaı, Aqmola, Qaraǵandy, Jambyl jáne Jetisý oblystary) jumys isteıdi.

Baqylaý beketterinde 1000-nan astam kólik jınalyp qalǵan.

Táýlik ishinde qutqarý bólimsheleri 691 adamdy qutqaryp, evakýatsııalady. Sonyń ishinde 137 bala bar, 145 tehnıka qar qursaýynan shyǵaryldy.

Turǵyndardy evakýatsııalaý úshin joldardyń jabyq ýchaskelerinde ýaqytsha jylytý pýnkteri uıymdastyrylǵan, sonymen qatar evakýatsııalaý tehnıkasy daıyn tur.

Ýaqytsha jylytý oryndarynda 179 adam bolsa, onyń 16-sy balalar.

Turǵyndardy aýa raıynyń qolaısyzdyǵy týraly eskertý maqsatynda 232 sms habarlama, «Dármen» mobıldi qosymshasy arqyly 114 habarlama jiberilgen.

Qutqarý jumystaryna barlyǵy 4 myńǵa jýyq adam men Tótenshe jaǵdaılar mınıstrligi, jergilikti atqarýshy organdar jáne Іshki ister mınıstrliginiń 1300-ge jýyq tehnıka birligi jumyldyrylǵan.

Respýblıkalyq jedel-qutqarý jasaǵynyń kúshteri Túrgen shatqalynan Almaty qalasyna 37 kólikti shyǵaryp salýda.

Jol qyzmeti joldy tazartý jumystaryn jalǵastyrýda.

Foto: gov.kz