Qazaqstanda táýligine 1 mln medıtsınalyq maska shyǵarylatyn bolady - Abaev

NUR-SULTAN. QazAqparat - Qazaqstanda táýligine 1 mln dana medıtsınalyq maska shyǵarylatyn bolady. Bul týraly búgin Ortalyq kommýnıkatsııalar qyzmetindegi brıfıngte QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Qazirgi ýaqytta bir táýliktiń ishinde óndiriletin barlyq maskanyń jalpy sany 604 myń danany quraıdy. Bul kólem aldaǵy ýaqytta táýligine 1 mıllıon danaǵa jetkiziledi. Nur-Sultan men Almaty qalalarynda táýekel tobyna kiretin adamdarǵa tegin maska berý uıymdastyrylady», - dedi mınıstr.

Onyń aıtýynsha, elimiz boıynsha 27 myń tósek-oryn daıyndalǵan. Elordadaǵy tósek-oryndardyń 25, al Almatyda 12 paıyzynda ǵana adamdar jatyr.

Sondaı-aq, BAQ ókilderi koronavırýs ınfektsııasynan qaza tapqandardy jerleý tetikteri bar ma dep suraǵan edi.

«Mundaı jaıttan Qudaı saqtasyn. Degenmen, bizde algorıtm ázirlengen. Ol búkil álemde qabyldanǵan normalar men standarttarǵa saı keledi. Sondyqtan bul máseleni naqty bir adamdarǵa qatysty talqylamaımyz dep oılaımyn», - dedi Dáýren Abaev.