Qazaqstanda Táýelsizdiktiń 30 jyldyǵyna arnalǵan «Qaıyrymdy ister» aktsııasy bastaldy
Aktsııa aıasynda satyp alýshylar muqtajdarǵa arnalǵan taýarlarǵa aqy tóleı alady jáne olardy dúkenderde, sýpermarketterde, dárihanalarda nemese kıim dúkenderinde aldyn-ala belgilengen arnaıy sórelerde qaldyra alady. Aktsııa uıymdastyrýshylary qazaqstandyqtarǵa qaıyrymdy isterdi kún saıyn, tipti jaqyn mańdaǵy dúkenge barý kezinde de jasaýǵa bolatynyn eske salady.
Qaıyrymdylyq aktsııasyna kez-kelgen adam qosyla alady. Ol úshin kásipkerler óz dúkenderine nemese dárihanalaryna arnaıy sóreler ornatýy kerek nemese basqa satyp alýshylar tólegen taýarlardyń tizimin jasaýy kerek.
Aktsııany alǵashqylardyń biri bolyp «Magnum» sýpermarketter jelisi qoldady. Máselen, 13 sáýirden 12 mamyrǵa deıin satyp alýshylar jeliniń barlyq dúkenderinen qaıyrymdylyq maqsattary úshin «Aýyzashar» jıyntyqtaryn satyp ala alady. Satyp alýshydan syıǵa tartylǵan árbir jıyntyqqa saýda jelisi óz atynan taǵy bireýin qosady jáne «Ýasılá» jáne «Ál-Amın» qaıyrymdylyq qorlary volonterleriniń kómegimen meshitterge tasymaldaıtyn bolady.
Sonymen qatar magnum.kz saıtynda Qazaqstan musylmandary dinı basqarmasy janyndaǵy «Zeket» qorynyń shotyna qarajat aýdara otyryp, satyp alýshy «sadaqa» retinde qaıyrymdylyq jasaı alatyn múmkindik qoljetimdi bolady. Bul fýnktsııa «Zeket» qory tólem paraqshasyna aparatyn QR-kody bar arnaıy taǵandarda ornatylady.
Sonymen qatar, Nur-Sultannyń, Almaty, Aqmola jáne Shyǵys Qazaqstan oblystarynyń dúkenderinde tegin taýarlary bar «jaqsylyq sóreleri» paıda boldy. Kásipkerlerdiń aıtýynsha, negizinen jergilikti turǵyndar onda eń qajetti azyq-túlikti qaldyrady: nan, maı jáne jarma.
Esterińizge sala keteıik, áleýmettik jelilerde #Qaıyrymdylar heshtegin paıdalana otyryp, óz ıgi isterińiz týraly aıtýǵa nemese óz qalańyzdyń qandaı dúkenderi qaıyrymdylyq aktsııasyna qoldaý kórsetkenderin bilýge bolady.