Qazaqstanda taýarlardy esepteýdiń baqylaý quraldary engizildi

ASTANA. QazAqparat - Qazaqstanda taýarlardy esepteýdiń baqylaý quraldary engizildi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Qarjy mınıstrligi Memlekettik kirister komıteti tóraǵasynyń orynbasary Mádı Takıev aıtty, dep habarlaıdy QazAqparat.

«Etıl spırtiniń, alkogol ónimderiniń jáne munaı ónimderiniń zańsyz óndirisi men aınalymyna qarsy turý úshin zańsyz aınalymdy tómendetýge múmkindik beretin jáne sáıkesinshe salyqtardyń jınalýyn kóbeıtetin Esepteýdiń baqylaý quraldary  engizildi. Qazirgi ýaqytta, EBQ 18 munaı óńdeý zaýytynda jáne 48 alkogol ónimderin óndiretin zaýytta ornatylǵan. Alkogol ónimderiniń jáne munaı ónimderiniń óndirisi men aınalymy boıynsha derekter naqty ýaqyt rejiminde «Ulttyq aqparattyq tehnologııalar» AQ-nyń operatoryna jiberilip otyrady», - dedi M.Takıev.

Onyń aıtýynsha, Esepteýdiń baqylaý quraldary  engizilgennen keıin 3 iri munaı óńdeý zaýyty men 4 shaǵyn munaı óńdeý zaýytynda óndiriletin benzın kólemi ótken jylmen salystyrǵanda 141 myń tonnaǵa artqan.

«Sonymen qatar alkogol ónimderin óndirý kólemi de artyp, 1 mlrd 477 mln teńge somasyna aktsızderdiń qosymsha túsýine ákeldi», - dedi komıtet tóraǵasynyń orynbasary.

Sonymen qatar M.Takıevtiń aıtýynsha, 2017 jyldyń 27 qarashasynda teri buıymdaryn tańbalaý boıynsha ilki  joba iske qosyldy. Sol ýaqyttan bastap 2018 jyldyń naýryzy aralyǵynda Qazaqstan Respýblıkasynyń saýda oryndarynda teri buıymdary úshin 221 046 dana baqylaý birizdendirý belgilerine tapsyrys berilgen. Bul resmı statıstıkalyq derekterden áldeqaıda joǵary.



Foto: mygoconsulting.com