Qazaqstanda taý-ken salasyna arnalǵan shahtalyq tireýishterdiń ónerkásiptik óndirisi bastaldy

NUR-SULTAN. QazAqparat - Qazaqstanda taý-ken óndirý salasynyń kásiporyndary qazba jumystary men tonnelderdiń kúmbezderin nyǵaıtý maqsatynda paıdalanatyn SVP 22 shahtalyq tireýishterdi ónerkásiptik óndirýge kiristi, dep habarlaıdy QR IIDM baspasóz qyzmeti.

Biregeı ystyqtaı ılemdelgen buıymdardyń eldegi óndirisi taý-ken salasyn qazaqstandyq óndirispen qamtýdy arttyryp, óndiristik materıaldar men jabdyqtar ımportyn 90-95 paıyzǵa qysqartýǵa múmkindik beredi.

Shahtalyq jumystar barysyndaǵy qaýipsizdik, kenshilerdiń ómiri men densaýlyǵy kóbinese shahta tireýishteriniń senimdiligine baılanysty bolady. Sondyqtan zaýyt ókilderi arnaıy aýystyrylatyn profıl GOST-qa sáıkes shyǵarylatyndyǵyna basa nazar aýdarady.

SVP 22 profılinen saqınaly bekitkishter men 3-5 býynnan turatyn ámbebap arkaly ıilgish bekitpe jasalady, olar erekshe beriktikti jáne júktemege tózimdi materıaldardy qajet etedi.

Sonymen birge SVP 22 shahtalyq tireýishteriniń birqatar artyqshylyǵy bar. Atap aıtsaq, paıdalaný merziminiń uzaqtyǵy, bastapqy pishinin ózgertpeı topyraq salmaǵyna tózý qabileti, buıymnyń otqa tózimdiligi men kúrdeli jaǵdaılarda birneshe ret paıdalaný múmkindigi.