Qazaqstanda tasqynnan búlingen úılerdiń sany qansha

<p>ASTANA. KAZINFORM &ndash; Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Qanat Myńbaev &laquo;Biz birgemiz&raquo; jalpyulttyq telekópirinde tasqyn saldarynan búlingen úılerdiń sanyn atady.</p>

«Qazirgi tańda 12 myńǵa jýyq turǵyn úı sý astynda qalyp, búlindi dep esepteldi. Odan bólek 23 myńdaı saıajaı bar. Bul jerde endi 3 myńnan astam turǵyn úı tehnıkalyq tekserýden ótti. Onyń ishinde 1505 úı jaramsyz dep tanyldy. 1700-deı úıdi jóndeýge bolady. Bul — sýdyń beti qaıtqan óńirlerdiń berip otyrǵan aqparaty», — dedi mınıstrlik mamany.

Komıtet ókili tasqyn saldarynan baspanasyz qalǵan turǵyndardyń aldynda úsh jol bar ekenin eske saldy.

«Qazirgi tańda úsh mehanızm bar. Onyń biri — zardap shekken baspana jaramsyz bolǵan jaǵdaıda jańadan úı salý. Ekinshisi — qoldanystaǵy turǵyn úıdi jóndeý. Úshinshi — sol óńirden jańa turǵyn úı satyp alyp berý. Eger saıajaı aýmaǵyndaǵy úı búlinse, ol turǵynnyń jalǵyz baspanasy bolsa, ol da memleket tarapynan óteledi», — dedi Qanat Myńbaev.