Qazaqstanda talapqa sáıkes kelmeıtin 22 tonnadan astam ónim satýdan alyndy

NUR-SULTAN. QazAqparat – Elimizde sanıtarlyq-epıdemıologııalyq talapqa sáıkes kelmeıtin 22 tonnadan astam ónim satýdan shyǵaryldy. Bul týraly QR Densaýlyq saqtaý mınıstriniń birinshi orynbasary Marat Shoranov málim etti, dep habarlaıdy QazAqparat tilshisi.

«Ótken jyly elimizdiń sanıtarlyq-epıdemıologııalyq qyzmeti ónimniń qaýipsizdigin baqylaý boıynsha birqatar mindetterdi oryndady. Sońǵy 7 jylda azyq-túlikke jatpaıtyn taýarlardyń ónim talabyna sáıkes kelmeýi 8% óskeni baıqalady. Al tamaq ónimderi boıynsha tómendeý baıqalady, 30,1% -dan 11% - ǵa deıin azaıǵan. Monıtorıng nátıjesi boıynsha 27 mln teńgeni quraıtyn sanıtarlyq-epıdemıologııalyq talapqa sáıkes kelmeıtin 22 tonnadan astam ónim satýdan alyndy», - dedi Marat Shoranov mınıstrlik alqasynyń keńeıtilgen otyrysynda.

Onyń aıtýynsha, profılaktıkalyq baqylaý qorytyndysyna sáıkes, shetelden ónim ákeletin 40 sýbektiniń akkredıtatsııalyq attestaty toqtatylyp, 12 mekemeniń sertıfıkaty keri qaıtaryldy.

«Pandemııa bastalǵaly halyqaralyq tájirıbe, epıdemıologııalyq jaǵdaıdy jáne koronavırýs ınfektsııasynyń taralýyn toqtatý basty nazarda. Osy oraıda indettiń aldyn alý, emdeý jáne karantın talaptary epıdjaǵdaıǵa sáıkes únemi jetildirilip keledi», - deıdi ol.

Buǵan deıin mınıstrdiń birinshi orynbasary birqatar densaýlyq saqtaý mekemelerinde sanıtarlyq-epıdemıologııalyq talaptardyń buzylǵanyn málimdegen edi.