Qazaqstanda talantty jastardan jasaqtalǵan shyǵarmashylyq vzvod quryldy

ASTANA. QazAqparat – Mamyrda QR Qarýly Kúshteri Ulttyq áskerı-patrıottyq ortalyǵynyń bazasynda merzimdi áskerı qyzmetke shaqyrylǵan sarbazdardyń arasynan shyǵarmashylyq vzvod jasaqtaldy.

Onyń quramyndaǵy bozbalalar tek urys taktıkasyna ǵana mashyqtanyp qoımaı, sonymen qatar án shyrqap, bı bılep, mobılografııa boıynsha shyǵarmashylyǵyn shyńdap júr, dep habarlaıdy QazAqparat tilshisi.

Ulttyq áskerı-patrıottyq ortalyq bastyǵynyń tárbıe jáne ıdeologııalyq jumys jónindegi orynbasary Erbolat Júsipovtiń aıtýynsha, mundaı erekshe vzvodty qurý - shyǵarmashylyq jastardyń damýy úshin biregeı múmkindik.

«Jas áskerge shaqyrylýshynyń shyǵarmashylyq áleýetin damytý maqsatynda vzvod quryldy. Shyǵarmashylyq vzvodqa 21 áskerge shaqyrylýshylar iriktelip alyndy. Onda sarbazdar ıkemdi baǵytyna qaraı úshke bólindi: horeografııa, vokal-aspaptyq jáne aralas, ıaǵnı jýrnalıster men mobılograftar. Vzvodqa bólimshe komandırleri, serjanttar nemese tıisti bilimi bar komandır taǵaıyndalady. Jalpy shyǵarmashylyq vzvod bolashaqta turaqty negizde jumys isteıdi. Muny jigitter úshin «áleýmettik lıft» dep aıtsaq ta bolady. Óıtkeni, olar elimizdiń Qarýly Kúshteriniń shyǵarmashylyq ujymdarynda kelisimshart boıynsha qyzmetin jalǵastyra alady», - dedi Erbolat Júsipov.

Munda jas sarbazdarǵa kásibı mamandardan bilim alyp, ózderiniń shyǵarmashylyq sheberligin odan ári shyńdaı túsýine múmkindik beriledi.

Vzvod qataryna alynǵandardyń biri - 19 jastaǵy elordalyq Ǵafý Qabıbolla. Ol kópbalaly otbasynan shyqqan. Qoǵamdyq tamaqtaný jáne servıs kolledjiniń úshinshi kýrsynda oqyp júrip, ásker qataryna shaqyrylypty.

«Maǵan vıdeo túsirip, ony óńdegen unaıdy. Bul óte qyzyq jáne tabandylyq pen ushqyr qııaldy qajet etedi. Men túrli kýrstarǵa qatysyp, mobılografııany óz betimshe úırendim. Árıne, shyǵarmashylyq vzvod qataryna qosylǵanyma qýanyshtymyn. Bul meniń bolashaǵym úshin taptyrmas múmkindik ári tájirıbe», - dep pikir bildirdi Ǵafý Qabıbolla.

Ortalyq basshysynyń orynbasary Erbolat Júsipovtiń sózinshe, mundaı erekshe vzvod qataryna qabyldanǵan sarbazdardyń ata-analary da rızashylyǵyn bildirýde. Óıtkeni, olar ásker qatarynda júrip, ózderiniń súıikti isterinen qol úzbeıdi, kerisinshe jetilip, damı túsedi.