Qazaqstanda taǵy da qursaqishilik úsh ota jasaldy
Ortalyq dárigerleri Mınsk respýblıkalyq ǵylymı-tájirıbelik «Ana men bala» ortalyǵy fetaldy medıtsına bólimshesiniń meńgerýshisimen birge Almaty qalasy, Almaty jáne Aqmola oblystarynan kelgen úsh júkti áıelge ota jasady.
Otany jasaý aıasynda myna jumystar atqaryldy:
- Feto-fetaldy transfýzııa sındromynan (FFTS) asqynatyn kópuryqty júktilik kezindegi balanyń joldasy anastomozynyń lazerli koagýlıatsııasy. Bul ádis uryqtar arasyndaǵy tamyrlardyń patologııalyq birigýin joıýǵa septik etip, sonyń arqasynda qatty asqynýdyń aldyn alady jáne egizderdiń ekeýiniń de ómirin saqtaıdy.
- Sharana suıyqtyǵy patologııasy bolǵan jaǵdaıdaǵy amnıoredýktsııa jáne amnıoınfýzııa. Bul protsedýralar uryqtyń damýyna qolaıly jaǵdaı týǵyza jáne asqyný qaýpin azaıta otyryp sharana suıyqtyǵy mólsherin retteýge kómektesedi.
- Uryqtyń búırek patologııasy bolǵanda qýyqty drenajdaý. Bul ota uryqtyń nesep aıdaý júıesiniń durys jumys isteýin qamtamasyz etedi jáne onyń durys damý múmkindigin jaqsarta otyryp búırek jetispeýshiligi asqynýynyń aldyn alady.
Barlyq otalar sátti jasaldy, naýqastardyń jaǵdaıy dál qazirgi sátte turaqty. Olardyń júktilik kezindegi densaýlyǵyn mamandar udaıy baqylap, uryqtyń odan ári durys damýyn qamtamasyz etýde.
Bul otalardy jasaý densaýlyq saqtaý mınıstrliginiń «Fetaldy medıtsına» jobasynyń arqasynda múmkin boldy. Endi qazaqstandyq áıelder álemdik standarttarǵa saı keletin joǵary tehnologııaly kómekti alyp, dúnıege deni saý bala ákelý múmkindigin aıtarlyqtaı arttyrady. Atalǵan joba ozyq medıtsınalyq tehnologııalarǵa qoljetimdilikti ulǵaıtýǵa jáne Qazaqstandaǵy júkti áıelderdiń bosanar aldyndaǵy kómek deńgeıin jaqsartýǵa baǵyttalǵan, ol bolashaq analarǵa balasynyń densaýlyǵyn ómiriniń basynan bastap saqtaýyna múmkindik beredi.