Qazaqstanda taǵy 8 sheteldik JOO fılıaly ashylady

<p>ASTANA. KAZINFORM — QR Ǵylym jáne joǵary bilim mınıstri Saıasat Nurbek Qazaqstanda sheteldik JOO fılıaldaryn ashý jumystary qalaı júrip jatqanyn baıandady.</p>

«Memleket basshysy 2025 jylǵa qaraı elimizde bedeldi sheteldik ýnıversıtetterdiń keminde 5 fılıalyn ashýdy tapsyrǵan bolatyn. Qazirgi tańda 20 jýyq myqty sheteldik ýnıversıtet Qazaqstanǵa shaqyryldy. Bıyl jańa oqý jylynda taǵy 8 fılıal ashylady», — dedi S. Nurbek Ortalyq kommýnıkatsııalar qyzmetinde.

Aıta keteıik, elimizde 2021 jyldan bastap álemdik joǵary oqý oryndarynyń 14 fılıaly jumys isteýde.

2029 jylǵa qaraı eldegi sheteldik JOO fılıaldary el ekonomıkasyna qajetti 2000-nan astam joǵary bilikti maman daıarlaıdy dep kútilýde.

Mınıstrliktiń habarlaýynsha, ál-Farabı atyndaǵy Qazaq ulttyq ýnıversıteti bazasynda ınjenerlik salada magıstrlerdi daıarlaý boıynsha Soltústik-batys polıtehnıkalyq ýnıversıtetiniń (QHR), Q.Sátbaev atyndaǵy Qazaq ulttyq tehnıkalyq zertteý ýnıversıtetiniń bazasynda — Gonkong qalasy ýnıversıtetiniń fılıalyn ashý qarastyrylǵan.

M.Dýlatı atyndaǵy Taraz óńirlik ýnıversıtetiniń bazasynda D. I. Mendeleev atyndaǵy Reseı hımııa-tehnologııalyq ýnıversıtetiniń fılıaly ashylady.

Ońtústik Qazaqstan pedagogıkalyq ýnıversıteti bazasynda — Gazı ýnıversıteti (Túrkııa) fılıaly; Astana Halyqaralyq ýnıversıteti bazasynda — Beıjiń tilder jáne mádenıet ýnıversıteti (QHR) fılıaly; Narhoz ýnıversıteti bazasynda Kvıns ýnıversıtetiniń (Irlandııa) fılıaly ashylmaq. 

Sondaı-aq, Ońtústik Koreıanyń KAIST jáne Výsong ýnıversıtetterimen yntymaqtastyq jumysy júrip jatyr. 

Budan bólek, elimizde úsh sheteldik myqty ýnıversıtettiń tolyqqandy kampýstary esigin ashady. 

Sheteldik ýnıversıtetter Qazaqstanǵa ınvestıtsııa salyp, ǵımarat salady nemese ony satyp alady jáne brıtandyq formatpen nemese sheteldik formatpen oqytýdy bastaıdy.

«Almatydaǵy De Montfort University-diń alǵashqy túlekteri kelesi jyly oqýdy bitiredi. Sondaı-aq, 16 qyrkúıekte Astanada brıtandyq Coventry University úlken kampýsy ashylady. Budan bólek, Túrkistan qalasynda ońtústikkoreıalyq Výsong ýnıversıtetiniń kampýsy ashylady. Osy úsh sheteldik ýnıversıtettiń erekshelikteri — ony bitirgen túlekter brıtan, káris dıplomyn alyp, sol elderde tolyqqandy jumys isteı alady», — dedi mınıstr.