Qazaqstanda tabysty arttyrýdyń arnaıy baǵdarlamasy ázirlenip jatyr

NUR-SULTAN. QazAqparat – Qazaqstandyqtardyń tabysyn arttyrýǵa arnalǵan arnaıy baǵdarlama ázirlenip jatyr. Bul týraly QR Premer-Mınıstri Álıhan Smaıylov málim etti, dep habarlaıdy QazAqparat tilshisi.

«Kásipkerlikti damytý Úkimettiń 2022 jylǵa arnalǵan is-qımyl baǵdarlamasynda aıqyndalǵan jańa ekonomıkalyq baǵyttyń biri. Josparda Memleket basshysynyń tapsyrmasy boıynsha bızneske qatysty karantındik sharany jeńildetýdi qaıta qarady. Sondaı-aq tarıfterdi, onyń ishinde kólik jáne logıstıka salasyndaǵy tabıǵı monopolısterdiń qyzmetterine tómendetý sharasy qabyldandy», - dedi Álıhan Smaıylov elordada ótip jatqan «Atameken» ulttyq kásipkerler palatasynyń kezekten tys ІH sezinde.

Onyń aıtýynsha, qazirgi ýaqytta Úkimet qańtar aıyndaǵy oqıǵalar barysynda shaǵyn jáne orta bızneske kelgen múliktik zııandy qalpyna keltirý jumystary júrip jatyr.

«Halyqtyń tabysyn arttyrýdyń arnaıy baǵdarlamasy ázirlenýde. Onyń ishinde jumyspen qamtý isin jalǵastyrý, ındýstrııalyq jáne aýyl sharýashylyǵy jobalaryn iske asyrý jospary bar. Sonymen qatar óndiristi tehnologııalyq jańǵyrtý, halyq kirisindegi teńgerimsizdikti teńestirý jáne adamı kapıtaldy damytý jónindegi sharalar josparlanyp otyr. Halyqtyń tabysyn arttyrý úshin de, bıznesti tabysty júrgizý úshin de ınflıatsııa deńgeıin tómendetý mańyzdy», - deıdi ol.

Sondaı-aq, Úkimet basshysy jahandyq pandemııaǵa baılanysty álem elderinde ınflıatsııanyń ósýi saqtalyp turǵanyn aıtty.