Qazaqstanda tabıǵı órttiń 50% astamy adamı faktordan bolady – QR TJM

NUR-SULTAN. QazAqparat – Jyl saıyn elimizde 800-ge jýyq orman jáne dala órtteri tirkeledi. Bul týraly QR Tótenshe jaǵdaı mınıstrligi Órtke qarsy qyzmet komıtetiniń tóraǵasy Nurbolat Derbisov aıtty, dep habarlaıdy QazAqparat tilshisi.

«Qazgıdromettiń boljamy boıynsha, bıylǵy úshinshi toqsanda aýa temperatýrasy ortasha +30ºS-qa deıin jetedi, al respýblıkanyń ońtústik, shyǵys jáne batys bólikterinde qurǵaqshylyq pen jaýyn-shashyn tapshylyǵymen aýa temperatýrasy +40ºS-qa deıin kóteriledi dep boljanýda. Munyń bári orman qoryndaǵy órt qaýpin edáýir arttyrady», - dedi N. Derbisov Ortalyq kommýnıkatsııalar qyzmetinde ótken baspasóz máslıhatynda.

Tabıǵı órt sebepterin taldaý kórsetkendeı, órt tutanýynyń tek 43%-y tabıǵı qubylystardan, naızaǵaı razrıadtarynan bolsa, 50%-dan astamyna adamı faktor sebep bolǵan.

«Osyǵan baılanysty, TJM ákimdiktermen jáne jergilikti polıtsııa qyzmetimen birlesip, halyqtyń ormandar men dala alqaptaryndaǵy qaýipsizdik talaptaryn saqtaýy, aýyl sharýashylyǵy uıymdarynyń órt qaýipsizdigi qaǵıdalaryn oryndaýyn qamtamasyz etý máselesin erekshe baqylaýǵa aldy. Barlyq óńirlerde keń aýqymdy aldyn alý is-sharalary júrgizilýde», - dedi Nurbolat Derbisov.

Buǵan deıin QR Tótenshe jaǵdaılar mınıstrligi órtke qarsy qyzmet komıteti tóraǵasynyń orynbasary Dmıtrıı Tıtov Alakól jaǵalaýyndaǵy aýqymdy órttiń mán-jaıyn aıtqan edi.