Qazaqstanda sybaılas jemqorlyqqa qarsy #AdaldyqJolymen chellendji bastaldy
Áleýmettik jeli qoldanýshylary QR Prezıdenti Qasym-Jomart Toqaevtyń bastamasymen jarııalanǵan «Volonter jyly» aıasynda uly oıshyldardyń rýhanı-adamgershilik qundylyqtaryn nasıhattaý maqsatynda #adaldyqJolymen chellendjine qatysýda.
Bıyl naýryz aıynyń basynda chellendjdi Aktóbe aýylsharýashylyq kolledjiniń stýdenti, volonter Gúljazıra Asýova bastap, jemqorlyqqa qarsy taqyrypqa arnalǵan óziniń óleńin oqydy.
«Memleket basshysy bul jyldy volonterlar jyly dep jarııalady. Sonymen qatar, bıyl jas urpaqty adaldyq pen parasattylyqqa, eńbek pen bilimge qushtar bolýǵa tárbıeleıtin uly qazaq jáne túrki oıshyldarynyń murasyna da zor mán berilýde. Men óz óleńim arqyly barlyq qazaqstandyqtardy áleýmettik indet bolyp sanalatyn jemqorlyqqa qarsy kúresýge shaqyramyn», - dedi Gúljazıra Asýova.
Ol estafetany «Іzgilik elshisi» jobasynyń volonterleri men barlyq qazaqstandyqtarǵa joldady.
Gúljazıranyń bul bastamasyn kóptegen jeli qoldanýshylary belsendi qoldady. Instagram jelisinde #adaldyqJolymen heshtegi arqyly azamattardy parasattylyqqa, adaldyq pen ádildikke shaqyratyn uly oıshylardyń shyǵarmalary men tól týyndylary oqylǵan júzge jýyq beınejazbalar júkteldi. Ár beınejazba #adaldyqJolymen heshtegimen belgilenedi.
Búgingi kúnge deıin chellendjge Almaty oblysy Tekeli qalasynyń ákimi Baqtııar Ónerbaev, «Jetisý – adaldyq alańy» jobalyq keńsesiniń jetekshisi Amanjol Jazyqbaev, «Adaldyq alańy» jobalyq keńsesiniń volonterlary, ýnıversıtetter men kolledj stýdentteri, mektep oqýshylary, mádenıet salasynyń qyzmetkerleri jáne basqalar qatysty.
Jalpy, estafetany Almaty, Túrkistan, Shyǵys Qazaqstan, Jambyl oblystary men Nur-Sultan qalasynyń turǵyndary belsendi qoldady. Facebook jáne Instagram jelileri beınejazba júkteletin basty alańǵa aınaldy.
Sondaı-aq, estafeta Qazaqstan halqy Assambleıasynyń músheleri men etno-mádenı birlestikterdiń ókilderine, QR Parlamenti Májilisiniń depýtaty Gennadıı Shıpovskıhke, QR Prezıdenti Ákimshiliginiń ınspektory Maksım Spotkaıǵa, «Jas Otan» jastar qanatynyń tóraǵasy Elnur Beısenbaevqa, «Qazaqstan barysy» jáne «Álem barysynyń» eki dúrkin chempıony Aıbek Nuǵymarovqa joldandy.
«Sonymen qatar, BAQ jáne óner salasynyń ókilderin atalmysh chellendjdi qoldaýǵa shaqyramyz» deıdi agenttik mamandary.