Qazaqstanda suıytylǵan munaı gazyn shyǵarýǵa tyıym salyndy

NUR-SULTAN. QazAqparat - 7 qazannan bastap suıytylǵan munaı gazyn (SMG) avtomobıl kóligimen áketýge úsh jyl merzimge tyıym salyndy, dep habarlaıdy QazAqparat Energetıka mınıstrliginiń baspasóz qyzmetine silteme jasap.

Mınıstrliktiń habarlaýynsha, buǵan deıin tyıym 2017 jyly úsh jyldyq merzimge engizilgen bolatyn.

Máselen, 2017 jyly eksporttyq jáne ishki baǵalar arasyndaǵy aıyrmashylyq edáýir joǵary bolǵan kezde ishki naryqtyń qajettilikteri úshin SMG-ni bólýdiń qoldanystaǵy tetiginde ótinimderdi qalyptastyrý jáne oryndaý kezinde, sondaı-aq QR ishki naryǵynda SMG-ni bólý kezinde gaz jelisi uıymdary tarapynan teris paıdalaný faktileri paıda bolady. Jekelegen gaz jelisi uıymdary ishki naryq qajettilikterin qamtamasyz etýge arnalǵan arzandatylǵan SMG-ni Qazaqstan Respýblıkasynan tys jerlerge zańsyz áketýdi júzege asyrdy. Suıytylǵan munaı gazyn Qazaqstan Respýblıkasynan tys jerlerge gaz jelisi uıymdarynyń zańsyz áketýi avtomobılmen júzege asyrylady, óıtkeni bul is júzinde baqylanbaıtyn kólik túri.

2017 jyly joǵaryda atalǵan tyıym salý týraly buıryq qabyldanǵannan keıin ishki naryqta SMG-ni jetkizý boıynsha jaǵdaı turaqtaldy, sondaı-aq Qazaqstan Respýblıkasynyń Shekara jáne Keden qyzmetterinen avtomobıl kóligimen suıytylǵan munaı gazyn Qazaqstan Respýblıkasynan tys jerlerge áketýge áreket jasaý faktileri týraly málimetter túsken joq.

Osylaısha, osy buıryqtyń qabyldanýy suıytylǵan munaı gazyn elimizden tys jerlerge zańsyz áketýge jol bermeýge jáne ishki bekitilgen baǵalar men eksporttyq baǵalardyń edáýir aıyrmashylyǵyna baılanysty ishki naryqta suıytylǵan munaı gazynyń tapshylyǵyna jol bermeýge baǵyttalady.