Qazaqstanda suıytylǵan gaz baǵasy tómendeıdi

NUR-SULTAN. QazAqparat - Elimizde memlekettik retteýdi engizý arqyly tótenshe jaǵdaı kezinde avtokólikterge arnalǵan suıytylǵan gazdyń baǵasy turaqtandyrylady. Bul týraly QR Energetıka mınıstrliginen málim etti, dep habarlaıdy QazAqparat tilshisi.

Vedomstvo málimetinshe, QR Prezıdenti janyndaǵy tótenshe jaǵdaı rejımin qamtamasyz etý jónindegi memlekettik komıssııa otyrysynda Energetıka mınıstrligine Ulttyq ekonomıka jáne Ádilet mınıstrlikterimen birlesip, avtogaz quıý stansalaryndaǵy suıytylǵan munaı gazyn satýǵa arnalǵan ýaqytsha memlekettik baǵalyq retteý engizý sharalaryn qabyldaý tapsyrylǵan.

«Eger buryn janar-jaǵarmaı quıý stansalaryndaǵy suıytylǵan munaı gazyna baǵany naryq rettese, endi tótenshe jaǵdaı engizilgennen keıin Energetıka mınıstrligi oblys ákimdikterimen birlesip, barlyq 2165 janarmaı quıý beketterindegi eń tómengi jáne eń joǵary baǵalardy taldap, memleket retteıtin baǵalyq shekteýlerdi ornatty. Ár aımaqtaǵy baǵa logıstıkalyq shyǵyndarǵa, zaýyttardyń geografııalyq jaqyndyǵyna, janar-jaǵar maı stansalarynyń sanyna, tutynýshylarǵa jáne taǵy basqalarǵa baılanysty. Tutastaı alǵanda, Qazaqstanda suıytylǵan munaı gazynyń ortasha baǵasy 8 paıyz tómendeıdi», - dedi mınıstrlikten.

Munan ózge de sharalar qoldanyldy. Mysaly AMÓZ saqtaý parkinen suıytylǵan munaı gazynyń ótkizý baǵasy tonnasyna 62 myńnan 56 myń teńgege deıin tómendedi.

Úsh mınıstrliktiń birlesken buıryǵy 2020 jyldyń 1 sáýirinde ashyq normatıvtik quqyqtyq aktilerdiń ınternet-portalynda ornalastyryldy. Qazirgi ýaqytta qujat bekitildi jáne Ádilet mınıstrligine memlekettik tirkeýge jiberildi.