Qazaqstanda sút bezi obyryna ota jasalǵannan keıin, pishinin qalpyna keltiretin em qoldanylady - onkolog

<p>PETROPAVL. KAZINFORM &ndash; Qazaqstanda barlyq aýrýlar ishinde onkologııa 7-shi orynda tursa, ólim-jitim boıynsha júrek-qan tamyrlary aýrýlarynan keıin ekinshi orynda keledi. Soltústik Qazaqstan oblysy kópbeıindi aýrýhana onkologııalyq ortalyǵynyń dárigeri, mammolog, onkohırýrg Erqanat Baıtursynnyń aıtýynsha, jylda dıspanserlik esepte turǵandardyń qataryna elimiz boıynsha 37 myń syrqat jańadan qosylady.</p>

Onkolog Erqanat Baıtursyn qaterli isik aýrýlarynyń ishinde sút bezi ragy birinshi orynda turǵanyn aıtady. Ortasha alǵanda, elimizde jyl saıyn 5 myńǵa jýyq áıelge osy dıagnoz qoıylady, 1200-ge deıin áıel qaıtys bolady.

«Qazirgi ýaqytta Qazaqstanda onkologııalyq aýrýlary bar 210 myńnan astam patsıent dınamıkalyq baqylaýda tur. Aýrýdyń qurylymyna toqtalsaq, 1 orynda - 13,2% sút bezi obyry, 2 orynda – 10% ókpe obyry jáne 3 orynda 9,3% kolorektaldy qaterli isik keledi. Osyǵan baılanysty onkologııalyq aýrý áıelderde jıi kezdesedi.

SQO boıynsha sút bezi obyry byltyr jańadan 237 patsıentte anyqtalyp, olar dıspanserlik esepke alyndy», - deıdi dáriger.

Sút bezi qaterli isigi erte satysynda anyqtalǵan jaǵdaıda em qonyp, onkologııalyq naýqastardyń 95% táýir bolyp ketedi.

«Sút bezi obyrymen kóbine eresek, artyq salmaǵy bar áıelder, alkogoldi ishimdikterdi jıi paıdalanatyndar, otbasynda jaqyn týystary osy dertpen aýyrǵandar, radıatsııalyq áserge ushyraǵandar, erte júkti bolǵandar, temekini paıdalanatyndar aýyrady. Sondaı-aq menopaýzadan keıingi gormondyq terapııa sııaqty faktor da isiktiń damý qaýpin artady. Desek te syrqattardyń jartysyna jýyǵy jasy qyryqtan asqan áıel, olarda sút bezi qaterli isiginiń basqa anyqtalǵan qaýip faktorlary bolmaǵan», - deıdi Erqanat Baıtursyn.

Onkologtyń aıtýynsha, otbasy múshesiniń sút bezi qaterli isigimen aýyrýy obyrdyń damý qaýpin arttyrady, alaıda sút bezi qaterli isigi dıagnozy qoıylǵan áıelderdiń kópshiliginde jaqyn týystary qaterli isikke shaldyqpaǵan.

Qazaqstanda sút bezi obyryn erte anyqtaý maqsatynda áıelder arasynda Ulttyq skrınıng júrgiziledi. Tegin skrınıngten 40 jastan 70 jasqa deıingi áıelder turǵylyqty jeri boıynsha emhanalarda ótedi.

«Árkim óz densaýlyǵyna muqııat bolǵany jón, halqymyz bekerden basty baılyq – densaýlyq demeıdi. Sondyqtan áıelderge eń keminde jylyna bir ret gınekolog pen mammolog tekserisinen ótýge keńes beremin. Sút bezderiniń qandaı ózgeristerine nazar aýdarý kerek? Eger sút beziniń kólemi men pishini ózgerse, ushy ishine tartylsa nemese bir jaǵyna qısaısa nemese erozııa, qotyr paıda bolsa, suıyqtyq aqsa, túri ózgerse, qoltyq asty nemese ústińgi terisi qalyńdap, isinse jáne keýdeniń bir bóliginde, sút beziniń aınalasynda nemese qoltyq asty jıi aýyrsa – mindetti túrde dárigerge qaralý qajet», - deıdi onkolog.

Mamannyń aıtýynsha, Qazaqstanda sút bezi qaterli isigi barlar hımıoterapııa, sáýlelik terapııa, radıkaldy hırýrgııalyq aralasý sııaqty em alýmen qatar, olarǵa rekonstrýktıvti-qalpyna keltirý operatsııalary qoldanylady.

«Bul emdeý ádisi kosmetıkalyq aqaýdy joıa otyryp, radıkaldy emdeýden keıin kesip alynǵan sút bezin hırýrgııalyq modeldeýden turady. Sút bezi qaterli isiginiń rekonstrýktıvti operatsııalary áıelge sút beziniń pishinin qalpyna keltirýge jáne aıtarlyqtaı psıhologııalyq qoldaý alýǵa múmkindik beredi», - deıdi Erqanat Baıtursyn.