Qazaqstanda sút baǵasy ózgere me – mınıstrdiń jaýaby

ASTANA. QazAqparat – QR Aýyl sharýashylyǵy mınıstri Erbol Qarashókeev turǵyndardy sút ónimderimen qamtý jumystary týraly aıtyp berdi, dep habarlaıdy QazAqparat tilshisi.

«Taýarly sút boıynsha biz áli óz qajettiligimzdi ózimiz jaba almaımyz. Bıyl elimizdiń barlyq óńirinde 65 taýarly-sút fermasynyń qurylysy bastaldy. Bul maqsatta 100 mlrd teńge bólindi, osylaısha taǵy 537 myń tonna sút ózimizde óndiriledi. Shamamen 30 ferma bıyl qoldanysqa beriledi», - dedi E. Qarashókeev Úkimet kýlýarynda.

Onyń aıtýynsha, kórshiles elderde sút baǵasynyń arzandaýy baıqalǵan.

«Onyń ústine biz iri taýarly-sút fermalaryna súttiń ár lıtrine 45 teńgeden sýbsıdııa beremiz. Sondyqtan, eldegi sút baǵasy jaǵdaıy turaqty, esh daǵdarys bolmaıdy», - dedi mınıstr.