Qazaqstanda «sur tárelkeni» taratýshylar kóleńkeden shyǵarylady

ASTANA. QazAqparat - Elimizde 600 myńǵa otbasy «sur» spýtnıktik tárelkelerdi paıdalanyp júr. Bul týraly búgin Senattyń jalpy otyrysynda QR Aqparat jáne kommýnıkatsııalar mınıstri Dáýren Abaev málim etti, dep habarlaıdy QazAqparat.

Aıta keteıik, búgingi jalpy otyrysta  palata depýtattary «Qazaqstan Respýblıkasynyń keıbir zańnamalyq aktilerine aqparat jáne kommýnıkatsııalar máseleleri boıynsha ózgerister men tolyqtyrýlar engizý týraly» zań jobasyn eki oqylymda qarap, qabyldady.

Osy zańnama aıasynda «sur tárelkelerdi» taratýdy quqyqtyq retteýge engizý qarastyrylǵan.

 «Búginde 600 myńǵa tarta otbasy «sur tárelkelerdi» paıdalanyp keledi. Bul óz kezeginde 600 myń otbasy qazaqstandyq telearnalardy qaramaıdy ári Qazaqstannyń aqparattyq keńistiginen tys qalyp otyrǵanyn bildiredi. ıAǵnı spýtnıktik tárelkeler qoıylyp, tólem QIWI-ámııan arqyly jasalady, sonymen qatar tólemder offshorlyq kompanııalar arqyly da iske asyrylýy múmkin. Olar quqyqtyq keńistikten tys. Bul zań jobasynda biz «sur tárelkelerdi» taratýshylardy quqyqtyq keńistikke kirgizip jatyrmyz. Ókinishke qaraı, osyǵan deıin atalǵan qurylǵylardy retteıtin eshqandaı norma bolmady. «Sur tárelkelerdi» ornatqan azamattarǵa eshqandaı ákimshilik yqpal etý sharalary qoldanylmaıdy. Bundaı sharalar bul qurylǵylardy taratatyndarǵa qatysty bolady. Osy oraıda biz olardy quqyqtyq keńistikke shyǵaramyz», - dep túsindirdi mınıstr.