Qazaqstanda sýdıalar sot sheshiminiń oryndalýyn qadaǵalaıdy

NUR-SULTAN. QazAqparat – QR Joǵarǵy Sotynyń baspasóz hatshysy Aıdos Sadýaqasov 2021 jylǵy 1 shildeden bastap kúshine enetin Ákimshilik rásimdik-protsestik kodekste qarastyrylǵan sýdıanyń mindetterin túsindirdi, dep habarlaıdy QazAqparat tilshisi.

«Bul zańǵa sáıkes, eshqashan memlekettik organ talapker rólinde bola almaıdy, tek qana jaýapker bolyp sanalady. Ekinshiden, kóp jaǵdaıda sottyń sheshimderi oryndalmaı jatady. Endi jańa zańnamaǵa sáıkes sýdıa sheshim shyǵaryp qana qoımaı, onyń oryndalýyn da qadaǵalaı alady. Eger laýazymdy tulǵa sot sheshimin oryndamasa, 50-den 100 AEK-ke deıin qarjylaı óndirip alý sharasy qoldanylady», - dedi dedi A. Sadýaqasov Ortalyq kommýnıkatsııalar qyzmetinde.

Osy oraıda shyǵarylǵan sheshim oryndalmaıynsha sýdıa ol adamdy jaýapkershilikten bosatpaıdy.

«Osy zań elimizdegi azamattardyń quqyqtyq qorǵalýy deńgeıin arttyrady», - dedi baspasóz hatshysy.

Budan buryn habarlanǵandaı, 2021 jylǵy 1 shildeden bastap Qazaqstanda Ákimshilik rásimdik-protsestik kodeks kúshine enedi.

Bul zań jeke adam men zańdy tulǵanyń memlekettik organǵa nemese laýazymdy tulǵalarǵa qarsy óziniń quqyǵyn durys qoldanýyna zor múmkindikter jasaıdy.

Eske sala keteıik, 2020 jyly 29 maýsymda Memleket basshysy Qazaqstan Respýblıkasynyń Ákimshilik rásimdik-protsestik kodeksine qol qoıdy.