Qazaqstanda sýarý maýsymyna daıyndyq qalaı

<p>ASTANA. KAZINFORM - &laquo;Qazsýshar&raquo; mekemesiniń Túrkistan oblystyq fılıaly sýarý maýsymyna daıyndyq aıasynda óz qaramaǵyndaǵy kanaldardyń 600 shaqyrymnan astam jerin mehanıkalyq ádispen tazalady. Budan bólek, memleketaralyq &laquo;Hanym&raquo; kanalynyń 18 shaqyrymǵa jýyq bóligine mehanıkalyq tazalaý jumysy júrgizilip, 20 myń tekshe metr laı tunbasy shyǵaryldy.&nbsp;</p>

Fılıal qyzmetkerleri «Naıman» kanalynyń 7,5 shaqyrym bóligin betonmen qaptady.

Al, Túlkibas aýdanynda 77 shaqyrymnan astam kanal betondalady. Búgingi tańda 13 birdeı kanalda qurylys jumystary júrip jatyr.

«Qazsýshar» mekemesiniń D.Qonaev atyndaǵy Úlken Almaty kanaly fılıaly Eńbekshiqazaq aýdanyndaǵy 5 gıdrotehnıkalyq qurylysqa aǵymdaǵy jóndeý jumystaryn júrgizdi.

Budan bólek, aýdandaǵy 6,1 shaqyrym kanalda mehanıkalyq tazalaý jáne 26 gıdrobekette jóndeý-qalpyna keltirý jumystary júrgizildi. 

Búgingi kúni kanaldar arqyly sý berý boıynsha qyzmet kórsetýge 355 shart jasalyp, ylǵaldandyrý jumystaryna 3,6 mln tekshe metr sý berildi. Naqty sýlandyrylǵan jer kólemi - 2000 gektar.

Qyzylorda oblysy boıynsha «Qazsýshar» fılıaly egis alqaptaryna sý jetkizip beretin Jańaryq kanalynyń 7 shaqyrymy mehanıkalyq ádispen tazalanyp, 132 myń tekshe metr topyraq shyǵaryldy.

Budan bólek, Qazaly aýdanynyń egis alqaptaryna sý jetkizetin Eńbek (uzyndyǵy – 6,1 shaqyrym) jáne KazSSR 50 jyldyq (uzyndyǵy – 3,5 shaqyrym) kanaldaryna tazalaý jumystary júrgizildi.

Syrdarııa aýdanynda Sol jaǵa magıstraldy kanalynyń bóligi topyraqpen nyǵaıtyldy.

«Qazsýshar» mekemesiniń Jetisý oblystyq fılıalyna tıesili sý arnalary da sýarý maýsymyna daıyn.

Fılıal qyzmetkerleri 74 shaqyrymǵa jýyq sý arnasyn mehanıkalyq ádispen tazalap, 174 tekshe metrge betondaý jumystaryn júrgizdi.

Budan bólek, bıyl 54 gıdrotehnıkalyq qurylysty jóndeýden ótkizý josparda bar.

«Qazsýshardyń» Aqmola oblystyq fılıalyna tıesili nysandarda da vegetatsııa kezeńi bastaldy.

Shaǵalaly sý qoımasy jáne «Nura-Esil» arnasy aımaqtaǵy turaqty sýarý kózderi bolyp tabylady.

Búgingi tańda sý tutynýshylarmen kelisimshart jasaý jumysy júrip jatyr. Aıta ketý kerek, óńirde 1 971,03 gektar egis alqaby sýarmaly sýmen qamtamasyz etiledi.

Jambyl oblysy boıynsha «Qazsýshar» fılıaly da sýarmaly kezeńge daıyndyq aıasynda sý sharýashylyǵy nysandarynda mehanıkalyq tazalaý, ákteý-syrlaý, qaqpalardy maılaý jáne aǵymdy jóndeý jumystaryn júrgizip jatyr.

Baızaq, Jambyl, Qordaı, Talas jáne Sarysý aýdandarynda vegetatsııalyq kezeń bastalyp, sharýalardyń suranysyna saı sý jiberilip jatyr.