Qazaqstanda sý tasqynyna qarsy is-sharalarǵa qansha qarajat bólindi

NUR-SULTAN. QazAqparat - Bıyl sý tasqynyna qarsy is-sharalarǵa shamamen 160 mlrd teńge bólý kózdelgen. Bul týraly QR TJM Tótenshe jaǵdaılardyń aldyn alý departamentiniń bastyǵy Rústembek Ámrın aıtty, dep habarlaıdy QazAqparat tilshisi.

«2021-2022 jyldarǵa arnalǵan sý tasqynyna qarsy is-sharalar jol kartasyn júzege asyrý aıasynda shamamen 2 mlrd teńge jumsaldy. 2022 jyly arnalardy tereńdetý, jaǵalaýlardy nyǵaıtý, gıdrotehnıkalyq qurylǵylardy jóndeý boıynsha 68 is-sharany júzege asyrý josparlanǵan. Olarǵa shamamen 160 mlrd teńge kózdelip otyr», - dedi ol Ortalyq kommýnıkatsııalar qyzmetindegi baspasóz máslıhatynda.

Sonymen qatar is-shara barysynda QR TJM Tótenshe jaǵdaılardy joıý departamentiniń bastyǵy Qaharman Orazalın izdeý-qutqarý jumystaryna kómektesetin volonterlik uıymdarǵa rızashylyǵyn bildirdi.

«Mınıstrlik 66 volonterlik uıymmen jumys isteıdi. Olarmen memorandýmdarǵa qol qoıylyp, is-qımyl algorıtmi bekitilgen. Ótken jyly olar 570 izdeý-qutqarý operatsııasyna qatysty», - dedi ol.