Qazaqstanda sý tapshylyǵy qaı deńgeıge jetýi múmkin

NUR-SULTAN. QazAqparat – Bıyl Qytaımen sý máselesine qatysty birlesken komıssııanyń josparlanǵan otyrysy ótedi. Bul týraly Ekologııa, geologııa jáne tabıǵı resýrstar mınıstrliginiń alqa májilisinde osy vedomstvonyń vıtse-mınıstri Serik Qojanııazov málim etti, dep habarlaıdy QazAqparat tilshisi.

«Ǵalymdardyń boljamy boıynsha Qazaqstanda 2040 jyldarǵa qaraı sý tapshylyǵy 50 paıyzǵa jetýi múmkin. Elimizdegi sý resýrstarynyń jartysyna jýyǵy ózge memleketterdiń aýmaǵynda qalyptasatynyn eskere otyryp, kórshiles memlekettermen áriptestikke erekshe kóńil bólý qajet. Ótken jyly Qytaıdan basqa kórshiles elder arasynda sý máselesine qatysty birlesken komıssııalarynyń josparlanǵan otyrystary túgel ótti. Pandemııaǵa baılanysty Qytaı tarapy komıssııa otyrysyn 2021 jyly birinshi toqsanda ótkizýdi surady», - dedi S. Qojanııazov.

Onyń aıtýynsha, vegetatsııalyq maýsymda sýdyń tapshylyǵyn sheshý maqsatynda qyrǵyz tarapymen elektr energııasymen almasý jóninde ýaǵdalastyqqa qol jetkizildi. Nátıjesinde, «Toqtaǵul» sý qoımasynan 330 mln tekshe metr sýarmaly sýdy qosymsha ótkizý qamtamasyz etildi. Osy tártip boıynsha Tájikstan aýmaǵynan 300 mln tekshe metr sý jiberildi.

Budan buryn habarlanǵandaı, 2020 jyly 1 022 ekologııalyq tekserý júrgizildi. Tekserister sanynyń azaıýy eldegi karantınge baılanysty. Tekserý nátıjeleri boıynsha 2 875 zań buzýshylyq anyqtaldy. Olardy joıý týraly 1 966 nusqama berilip, sonyń 1 540-y oryndaldy.