Qazaqstanda sý resýrstary máselelerine arnalǵan ǵylymı-taldaý ortalyǵy ashylady

NUR-SULTAN. QazAqparat – Elimizde sý resýrstaryna qatysty máselelerdiń sheshimin ǵylymı turǵydan qamtamasyz etý úshin salalyq ǵylymı-zertteý taldaý ortalyǵyn qurý josparlanyp jatyr. Bul týraly QR Ekologııa, geologııa jáne tabıǵı resýrstar vıtse-mınıstri Serik Qojanııazov málim etti, dep habarlaıdy QazAqparat tilshisi.

«Úkimet sý resýrstaryn basqarýǵa qatysty birneshe shara qabyldap jatyr.

Birinshi, transshekaralyq sý resýrstaryn paıdalanýda kórshilermen memleketaralyq sý qatynastaryn qurý kezinde halyqaralyq sý quqyǵy qaǵıdattaryn barynsha iske qosý qajettigi.

Ekinshi, sýǵa degen suranys artqan jaǵdaıda tapshylyqty joıýǵa qatysty. ıAǵnı qolda bar sý resýrstarynyń áleýetin saqtap, sý resýrstaryn ıgerýde ıntegratsııalanǵan basqarý praktıkasyn jaqsartý. Sonymen qosa halyqty, sý júıeleri men ekonomıka salalaryn sýmen teńgerimdi qamtamasyz etýge mán berilip jatyr», - dedi Serik Qojanııazov «ECOJER» ІІ halyqaralyq ekologııalyq kongresine qatysýshylardyń suraǵyna jaýap bere otyryp.

Onyń aıtýynsha, sý resýrstaryn qorǵaý, baqylaý jáne paıdalanýda basseındik ınspektsııanyń qyzmetin kúsheıtý qajet.

Sebebi búginde basseındik ınspektsııa qyzmetkerleriniń júktemesi joǵary bolýyna baılanysty sý qoryn qorǵaýda baqylaý álsiregen.

«Joǵaryda atalǵan sý resýrstaryna qatysty máselelerdiń sheshimin ǵylymı turǵydan qamtamasyz etý úshin «Qazaq Sý sharýashylyǵy» ǵylymı-zertteý ınstıtýtynyń bazasynda sý resýrstary men sý sharýashylyǵy problemalary jónindegi salalyq ǵylymı-zertteý taldaý ortalyǵyn ashý josparlanyp jatyr. Maqsat – Sý resýrstary komıteti men basseındik ınspektsııany nyǵaıtý», - deıdi ol.

Aıta keteıik, elordada ótip jatqan «ECOJER» ІІ halyqaralyq ekologııalyq kongresinde 2030 jylǵa qaraı Qazaqstanda sý resýrstarynyń tapshylyǵy bolatyny týraly málim etildi.

Sondaı-aq elimizde 2025 jylǵa deıin 9 sý qoımasy salynatyny aıtyldy.