Qazaqstanda strestik aktıvter mólsheri 2,3 trln teńgeni qurady

NUR-SULTAN. QazAqparat – 2016 jyldan beri 6,7 trln teńge somasyndaǵy strestik aktıvter esepten shyǵaryldy. Bul týraly strestik aktıvter naryǵyn damytý máseleleri boıynsha ózgerister týraly zań jobasyn talqylaý kezinde QR Qarjy naryǵyn retteý jáne damytý agenttiginiń tóraǵasy Mádına Ábilqasymova málim etti, dep habarlaıdy QazAqparat tilshisi.

«2016 jyldan bastap bank sektoryn qalypqa keltirý boıynsha qabyldanǵan sharalar nátıjesinde 6,7 trln teńge somasyndaǵy strestik aktıvter esepten shyǵaryldy. 2022 jylǵy 1 qańtardaǵy jaǵdaı boıynsha strestik aktıvter mólsheri 2,3 trln teńgeni nemese bank júıesi aktıvteriniń 6 paıyzyn quraıdy», - dedi Mádına Ábilqasymova.

Onyń aıtýynsha, strestik aktıvterge tóleý merzimi 90 kúnnen asqan (870 mlrd teńge) kredıttermen qatar, qaıta qurylymdalǵan kredıtter (936 mlrd teńge), óndirip alynǵan múlik (156 mlrd teńge) jáne bankterdiń strestik aktıvterdi basqarý jónindegi enshiles uıymdarynyń aktıvteri (356 mlrd teńge) jatady.

«2019 jyly júrgizilgen aktıvterdiń sapasyn táýelsiz baǵalaý qorytyndysy boıynsha strestik aktıvterdiń úlesi bankterdiń nesıe portfeliniń 21 paıyzy bolyp baǵalandy. Anyqtalǵan shyǵyndardy óteý úshin bankter 554 mlrd teńgege qosymsha provızııalar qalyptastyrdy, 128 mlrd teńgege kapıtaldy qosymsha ulǵaıtty», - dedi agenttik basshysy.