Qazaqstanda sportzalmen qamtamasyz etý deńgeıi qandaı

NUR-SULTAN. QazAqparat - Batys Qazaqstan, Túrkistan, Jambyl jáne Aqtóbe oblystaryndaǵy mektepterdiń 20-25 paıyzǵa jýyǵy sport zaldarsyz jumys istep jatyr. Bul týraly Parlament Senatyndaǵy Úkimet saǵatynda QR Mádenıet jáne sport vıtse-mınıstri Eldos Ramazanov aıtty, dep habarlaıdy QazAqparat tilshisi.

«Dene shynyqtyrýmen jáne sportpen belsendi aınalysatyndardyń arasynda mektep oqýshylarynyń úlesi basym. Mektep jasyndaǵy 1 mln 834 myń bala sport zaldarmen qamtylǵan, bul óz kezeginde oqýshylardyń jalpy sanynan 63 paıyzy», - dedi E. Ramazanov.

Bilim jáne ǵylym mınıstrligi málimetinshe, mektepterdiń kóbisinde sportzaldar bar. Memlekettik jalpy bilim beretin mektepterdiń sporttyq zaldarmen qamtamasyz etilýi 84,5 paıyz (qalada - 96 paıyz, aýylda - 80,8 paıyz). Sonymen qatar, 6 203 mektepte sport alańy jasaqtalǵan.

«Osy oraıda bir problemaǵa nazar aýdarǵym keledi, aýyldyq jerde árbir besinshi mektepte sportzal joq. Sportzaldardyń jalpy sanynda tek 62,7 paıyzy standartty jabdyqpen qamtylǵan, al 11 paıyzy beıimdelgen ǵımaratta ornalasqan. Sporttyq zaldar Nur-Sultan, Almaty qalalaryndaǵy, sondaı-aq Mańǵystaý, Qyzylorda, Pavlodar jáne Atyraý oblystarynyń barlyq mektepterinde bar», - dedi vıtse-mınıstr.

Bilim jáne ǵylym mınıstrliginiń aqparatyna súıensek, Batys Qazaqstan, Túrkistan, Jambyl jáne Aqtóbe oblystarynda mektepterdiń 20-25 paıyzy (negizinen aýylda) sportzaldarmen qamtamasyz etilmegen.