Qazaqstanda sporttyq kólikter shyǵaryla bastady
14:43, 12 Qyrkúıek 2012
ASTANA. 12 qyrkúıek. QazAqparat - «AZIıA AVTO» qazaqstandyq avtokólik qurastyrý zaýyty KIA Cerato Koup modeliniń úsh esikti shektelgen partııasyn shyǵardy.
Bul kólik qazaqstandyq avtoónerkásiptegi sporttyq kýpe segmentinde alǵashqy bolyp tabylady.
Taratylǵan málimetterge qaraǵanda, bul Cerato Koup (Cherato Kýp) kýpesi KIA Cerato sedanynyń bazasynda shyǵarylyp otyr. Atalǵan kólikke sporttyq negiz berý úshin onyń jabdyqtary jeńildetildi, keıbir qurylǵylary kúsheıtilip, jetildirilgen. Kýpe sedannan birneshe santımetrge qysqalaý bolsa da, onyń salonynda 5 adam emin-erkin otyra alady eken. Sondaı-aq onyń artqy júk bólimi 440 lıtr kólemdi quraıdy.
Qazaqstandyq Cerato Koup 156 at kúshi bar 2 lıtrlik benzındik qozǵaltqyshpen jabdyqtalmaq.