Qazaqstanda sportty damytýdyń jańa baǵdarlamasy qabyldanady
«Sport sektsııalarynan bastap olımpıadalyq rezervti qalyptastyrýǵa deıingi barlyq deńgeıdegi sportshylardy daıarlaý júıesinde keshendi úlken ózgerister qajet. Búgingi tańda bizdiń aldymyzda úlken mindet tur. Ol degenimiz ınfraqurylymdy damytý, jarystar men daıyndyq jıyndarynyń kúntizbesin júıeleý, kásibı jáne buqaralyq sportty qarjylandyrýda teńgerim ornatý. Sonymen qatar barlyq deńgeıdegi sport mektepterin jasaqtaýdy, tóreshilerdi, jattyqtyrýshylardy, sport dárigerlerin jáne taǵy basqalardy qosa alǵanda, sportty damytýdyń baǵdarlamalyq paıymyn qalyptastyrý. Osy oraıda sportty damytý baǵdarlamasyn ázirlep, Prezıdentpen kelisip, ony iske asyrýǵa kirisemiz. Oǵan qosa sportshylardy kelesi «Parıj-2024» jáne «Mılan-2026» olımpıada oıyndaryna daıyndaýdyń eki qosalqy baǵdarlamasy bar», - dedi Dáýren Abaev.
Sondaı-aq, mınıstr sportty damytý sharasyna tikeleı ózi jaýap beretinin aıtty.
«Mınıstrlik olardy iske asyrý úshin tolyq jaýapkershilikti óz moınyna alýǵa daıyn. Sportty damytýdyń baǵdarlamalyq kózqarasyn daıyndaýdaǵy alǵashqy qadam - sportshylardy daıarlaýdyń búkil júıesiniń jaı-kúıin táýelsiz keshendi tekserý bolýǵa tıis. Jaýapty vıtse-mınıstrden ony uıymdastyrý jóninde usynystar daıyndaýdy suraımyn», - deıdi ol.
Aıta ketsek, Şýchınskide Beıjińde ótken XXIV qysqy olımpıada oıyndarynyń qorytyndysyna arnalǵan keńeıtilgen otyrys ótip jatyr.